Sunday, January 27, 2008

المطر...غزه...سيناء









بتمطر
بتمطر هنا في دبي
في مدينة البلاستيك النابتة وسط الكثبان
وهي هنا تمطر مطر مختلف
المطر هنا قطرات متلاحقة صغيرة لا تتوقف
لا تشتد ولا تنقطع قبل أيام
يبهرني كيف أن قطرات صغيرة متلاحقة كتلك قادرة على أن تحدث هذا

هكذا كانت الإمارات الاسبوع قبل الماضي (تماما بعد زيارة مولانا بوش ولي النعم)، قطرات صغيرة من المطر أشبه بالرذاذ قادرة على تحويل شوارع دبي والشارقة لأنهار، دبي بكل جنون العظمة الذي تكاد تنفجر به، بكل غرورها الفارغ وأبراجها العملاقة وأقتصادها الذي يتحدث به الركبان وجزرها الصناعية غرقت في قطيرات المطر المتلاحقة
العنيدة
المثابرة التي أسرتها محولة أياها لمدينة القنوات المائية
الأن هي تمطر مرة أخرى
قطيرات عنيدة متتالية أخرى
صغيرة ومثابره
أظنها ستمنحنا فيضانا أخر

هي تمطر هنا كما تمطر بمصر
كما تمطر على أبواب غزه التي إنهارت

كيف أشعر في إتجاه ما حدث؟
من شهور طويلة ركبت السيارة مع صديقي الفلسطيني الذي لم يرى فلسطين ابدا، شغل في الكاسيت أغاني شعبية وثورية فلسطينية
خنقته العبارة ودمعت عيناه
بقطرات صغيرة كثيرة متتالية كهذا المطر
أنا أيضا دمعت عيناي
هو بكى وطنه السليب
لكن ماذا بكيت أنا؟
بكيت فلسطين؟
لم؟
هي ليست ارضي
ولا وطني
ولم ارها أبدا
ولست قوميا عربيا
ولا أخوانجي
ولا أؤمن لا بوحدة أمة عربية ولا بوحدة أمة إسلاميه
لم بكيتها؟
أي شىء بتلك الأرض؟
لا
بل أي شىء بنا نحن المصريين يربطنا بها
لم تكن أرضنا أبدا وإن حكمناها
لم نطالب بها إبدا وإن سيطرنا عليها
ولم ننزف من أجل أرض كما نزفنا من أجلها (ألهم إلا سيناء)
لم يقتل مصريون عبر التاريخ كما قتل على ارضها ألهم إلا سيناء)
منذ البدء كانت فلسطين الأرض التي يحارب المصريون عليها ومن أجلها
كم مرة حاربنا على أرضها؟
شعوب الرمال
الهكسوس
الحيثيين
شعوب البحر
الصليبيين
العثمانيين
العبرانيين الجدد (إسرائيل)
لو نبشتم تحت أحجارها لوجدتم تحت كل حجر جمجمة مصرية
تلك الأرض التي أرتوت من دمائنا
كيف لا تكون مقدسة؟


لو ليس نحن....فمن؟

لو ليس الأن....فمتى؟


تذكرت تلك الجملة منفصلة عن سياقها وأنا أرى أسوار غزة تنهار والغزاوية يدخلون مصر


نعم لو ليس نحن فمن؟، لو ليست مصر فمن؟ لو ليس المصريون فمن؟
متى كنا بخلاء؟ متى كنا مقبوضين اليد؟ متى أستطعنا أن لا نعطي؟

متى لم نفتح أذرعتنا لأحتضان كل من أحتمى بنا، كل من أستجار بنا، لو ليس نحن فمن؟

هم؟


أكيد لأ

لو لا نفتح الحدود للغزاويه فلمن نفتحها؟
لو لا نفتح الحدود للفلسطينيين فلمن نفتحها؟ ومن أولى منا بلحمنا ودمنا بذلك الشعب المستضعف في أحضاننا في أحضان مصر الحقيقية مصر القويه القادره المهيبه التي لا تخاف ليست مصر مبارك الخائفة الخانعة المرتعده

ولو ليس لهم سوى حق الجيرة و(الحيط في الحيط) كفاهم
لو ليس لهم سوى حق أن نجيرهم على من يستضعفهم كفاهم

كيف يستضعف شعب نحن جيرانه
كيف يجوع أناس نحن جيرتهم؟

لو ليست الهيبة لنا نحن المصريين
فلمن الهيبة؟
ولو ليس الجود والكرم منا نحن أبناء النيل فمن من؟

ولو لا نفتح حدودنا وأحضاننا وقلوبنا وبيوتنا
فمن؟

فلسطين
الطفلة الجريحة الراقدة على كتف مصر
لا خلاص لنا منها
ولا خلاص لها منا
هي منا بمثابة اللحم والدم
والعقيدة والمبدأ والتاريخ
درع مصر الشرقي
إن أنكسرنا فيها ضاعت مصر
وإن أنتصرنا فيها لم نقهر

لو لا يأتون الينا فلمن سيذهبون؟

لهؤلاء؟























مرة أخرى

لو ليست مصر ...فمن لها؟

لو ليس الأن...فمتى؟

طيب أستنى بس يا عم
أصبر عليا
أنا موافق
ع العين والراس وكل حاجه
يدخلوا في قلوبنا
وأحنا لها وكل حاجه
لكن

دي سينا يا أبو أسكندر
ســـــــــــــــيناء
أرض الفيروز
أرض حورس

سيناء
لأ مش سينا رجعت تاني لينا ومصر اليوم في عيد والمهرجانات التلفزيونيه
لأ
سينا ألي بجد
بحق وحقيقي
سيناء التي حاربنا من أجلها وعليها أكثر حتى مما حاربنا على الوادي أو من أجله
سيناء
أرض حورس
مقبرة الشهداء
لحمنا بجد بقى
مش كلام ولا شعارات ولا شعر
لحمنا بحقيقي
كل ذرة تراب فيها بغلاوة ذرة تراب في القاهره
كل متر من ارضها بغلاوة متر من أرض الوادي
سينا
بلدنا يا جدع
أرضنا
بتاعتنا
فيها كلام دي؟

أه فيها
أيه؟
أسرائيل طمعانه فيها مثلا؟
لأ
مش موضوع اسرائيل
أسرائيل طمعانه في أكتر من كده

أقولكم حاجه؟
سمعتم عن أختراع أسمه الحزب السوري القومي الإجتماعي ؟

هو بأختصار كده بينادي باقوميه السوريه وبتكوين سوريه الكبرى- من يريد الإستزادة فعليه بموقع الحزب عن طريق الرابط-

طيب وماله؟
بالهنا والشفا

أخوتنا برضه السوريين وحبايبنا وجران وأنا مراتي سوريه
ونهار أبيض لما تبقى سوريا الكبرى بدل سوريا بس

م م م م م م م م (لفظ ترقب)
شوفوا معايا البتاعه دي


وألى مش شايفها كويس يروح الرابط ده يمتع بيها نواظره

دي يا اسيادنا خريطة سوريا الكبرى طبقا للحزب السوري القومي الإجتماعي الذي هو على فكره عضو في الحكومه السوريه وشرعي وقانوني ، تشمل سوريا الكبرى كما هو مبين في الخريطه من الشرق للغرب:

العراق، الكويت، سوريا، لبنان، الأردن، فلسطين، جزيرة قبرص و.....ســـيناء

أيوه
ســيناء
سينا بتاعة رجعت تاني لينا ومصر اليوم في عيد
سينا ألي شرق قناة السويس
سينا بتاعتنا
بيعتبرها الحزب القومي السوري الإجتماعي قطعة من سوريا الكبرى
مش بتاعتنا
مش أرضنا
بتاعتهم هما
أرضهم هما














طيب ليه؟
عشان مصر في افريقيا وسيناء في أسيا
تبقى مش بتاعتنا
بجد
هو ده الرد
يخرم ودنك السؤال الإستنكاري: هي سيناء مصريه؟
طيب ترد تقول ايه؟

في جلسه من أسبوعين مع شلة من فلسطينيين وسوريين عرفني عليهم صديقي الفلسطيني الذي بكينا سويا في السياره (فاكرين ولا تهتوا مني؟) المهم الشله ظريفه والناس محترمه وكالعاده الكلام أتوصل عن الظروف السياسيه ومش فاكر أجت سيرة سينا منين
لقيت واحد منهم بيقول الأتي:" هي سيناء مصريه؟ دي السلطان عبد العزيز العثماني وضعها أمانه عند مصر خوفا عليها من أطماع اليهود." مبدئيا اشهد له بالثقافة والمعرفة ودماثة الخلق، وأشهد له بالإفراط في مدح مصر والمصريين

لكن
لكن السؤال الملعون ده
هي سيناء مصريه؟

السلطان عبد العزيز وأمانه..؟!!
تخريفه؟
يمكن

كلام فارغ
غالبا

لا قيمة له

أكيد

ولا قيمة لحبات المطر الصغيرة التي لا تتوقف عن الهطول
تافهة كل منها ولا قيمة حقيقية لها...صحيح

منذ عام تقريبا أقترح أوزير اسرائيلي ان تمنح مصر جزءا من سيناء لتوطين الفلسطينيين...نقطه

الجمعه الماضيه في برنامج هيكل تحدث عن تقرير لهيئة أمريكية يطرح توطين الفلسطينيين بسيناء ، ويسجل أن سكان العريش هم بقايا الحاميات البوسنيه العثمانيه....نقطه


هو فيه نيه لنشل سيناء مننا ولا ايه؟


















هو أول الكلام كان أيه؟!!





14 comments:

appy said...

يانهار ابيض
ايه ده انت خليت المطر بدل ما بيزحلق عربيتى زحلق دماغى هو انت كنت كاتب البوست ده ليه
وامانه مين اللى سايبها عندنا يا نهار ابيض ليه هى شنطه ولا علبه
سيناء مصريه وبقولك ايه محدش يقدر يأخدها انا من العريش وعارفه اهل بلدى اطمن قوى محدش يقدر بجد
وانا قولت من الاول ممكن نستضيف حد فى بيتنا بس مش نسيب بابنا مفتوح طول الوقت ضربونى وبهدلونى تقولش اكلت عيل من عيالهم يالا ولسه هنتفرج

Nsreen Bsunee said...

صديقى
طيب لو القطرات منحت سيناء فيضان تفتكر مش حتكون النتيجه ان سبتمبر اسود زى اللى حصل فى الاردن حيكون من نصيبنا فى مصر

ده فى حاله لو حضرتك بتقصد بالفيضان اننا نوطن الفلسطينيين عندنا فى ارضنا


حضرتك ايه اخبارك فى المطر ده يا ابو اسكندر

قليل من التفكير said...


الحزب السوري الاجتماعي لو فعلا ديه أيدولوجيتهم يبقوا ناس عبط

ببساطة لان معروف ان الكبير بياكل الصغير

يبقي ازاي العراق هيدخل تحت سوريا ...
دا في الخريطة كمان حاطين قبرص اللي بيتخانق عليها تركيا واليونان .

بس اللي أعرفه ان الحزب ده موجود بنشاط في لبنان وليه منتمين كتير

Fantasia said...

الاستاذ العزيز Alexandrian

الاطماع في مصر لا تعد وليس لها حدود
هذا هو قدر مصر على مر التاريخ
هي حتمية جغرافية ان صح التعبير
لكن الذي زاد الامور سوءا في وقتنا الحالي هو نوعية الخصم الذي نواجهه

باختصار مصر كانت زمان مطمع للدول العظمى
دلوقتي بقينا مطمع من الجيران اللي بلدهم كلها على بعضها متجيش جزء من سينا اللي حاطين عينهم عليها
احنا بقينا ملطشة ولا إيه؟
وايه موضوع سينا مش مصرية دا؟
ازاي يعني. دي طابا, اللي مساحتها كيلومتر مربع, خدناها بالتحكيم الدولي. يعني اثبتنا بالوثائق انها مصرية. يقوموا شوية المخرفين بتوع الحزب السوري الاجتماعي عايزين يلهفوا سينا كلها؟
ولسة.. ياما ف الجراب يا حاوي

اشكرك يا استاذي الفاضل على هذا الموضوع الهام

خالص تحياتي واحترامي

Alexandrian far away said...

العزيزة أبي
تحياتي
وصباح الخير أو مسائه على حسب توقيتك المحلي
:-)
يا أهلا وسهلا بريحة العريش وشمال سينا
أنا الصراحه كتبت البوست ده لأني كنت محتاج أرتب أفكاري
او بمعنى أصح ارتب أفكاري مع مشاعري وأعمل تناغم ما بينهم وفي نفس الوقت محتاج حد يفكر معايايمكن يضىء ليا مساحات أو مناطق جديده
وعموما كلنا عارفين أن السيناويه قدها وقدود

تحياتي

Alexandrian far away said...

الصديقة العزيزة نسرين
تحياتي القلبيه
لا أعتقد أنه يوجد ولا فلسطيني واحد طمعان في شبر من أرضنا
وربما أكون على خطأ طبعا
أسمحي لي هناك فارق كبير جدا بين الأردن وبين مصر، بين مملكه كرتونيه الأغلبيه الساحقه من شعبها فلسطينيين أصلاء ، وما بين دولة كبيره عريقة متماسكه قوميا
وأنا لا أخشى الفلسطينيين لكن أخشى أن نصل مع سيناء إلى ما وصل إليه المغاربه مع الصحراء المغربيه، مشكوك دائما في أنتمائها لهم ومضرون دائما للدفاع عن كونها جزء من وطنهم

المطر طلع فطشه يا ستي ومطرت دقيقتين وخلاص
لكن الفيضان السابق حبسني أربع ايام في البيت

تحياتي

mohand said...

السلام عليكم

ياه ه ه ه ه

بقالي كتير مجيتش هنا

من ايام موضوع حنين والتسييح في بوست

بس كانت ايام

انا عموما كنت جاي عشان ارد علي تعليقك عند فانتازيا

بس لاقيت البوست قريت منه
------------------------
انا مش معاهم في اقتحامهم السور
بس اوقات يا اسكندراني لما بيشتد الجوع علي ناس

ويحسوا انهم هيموتوا وعايزين مكان يحتموا به



الغضب بيعميهم

وبيعملوا اي حاجه

اللي اقصده ان الخطأ في منظورنا بيكون صحيح في منظور الغير والعكس

تبعا للموقف
--------------------
يا تري غير مرغوب فيا هنا كمان؟

Marvel said...

كلمتين لخصوا الموضوع كله..ما هو محدش فاهم حاجة

اي كلام بقى يتقال دلوقتي ومفيش حد فاهم الحقيقة فين ولا ايه الصح وايه الغلط

انا نفسي مبقتش عارف اذا كان دخول اقتحام الغزاوية للمعابر بالشكل ده صح ولا لأ

ولا اننا نحارب كل ده عشان نرجع سينا وبعد كده منعملش فيها غير كام فندق وقرية سياحية

ولا حد فاهم اي حاجة..من اكبر راس لاصغرهم

اعتقد ان مصر دخلت في لعبة الفوضى البناءة مع تحيات كونداليزا رايس..والله اعلم هنطلع من اللعبة دي ناقصين سينا ولا زايد علينا غزة

Alexandrian far away said...

عزيزي قليل من التفكير
- وإن كنت ارى ما لديك من التفكير ليس بالقليل ابدا-
طبعا لا علم لي والحقيقة أنني لا أهتم بالوسائل التي يضعها ذلك الحزب لتحقيق حلمه العجيب، لكني ما يثير غيظي في طرحه هو أنه بينما تعامل مع دول الشام كلها والعراق ب (وحدوية) جاعلا أياها جزء من سوريته الكبرى بكليتها، فإنه تعامل مع مصر بموقف استعماري واضح الا وهو أنتزاع جزء من مصر وضمه لتلك الدولة الموهومه
حتى لو كان حلمهم مستحيل
فمعنويا يضع هذا الحزب نفسه في خانة أعداء مصر
أما عن نشاط الحزب بلبنان
فلبنان يا عزيزي من حيث السياسة هي المكافىء للهند من حيث الأديان
فيها ما لا عين رأت ولا اذن سمعت ولا خطر على قلب بشر

تحياتي ودعوتي بدوام التواصل

Alexandrian far away said...

الصديقه العزيزه فانتازيا
مصر لم تكن فقط مطمع للدول العظمى
بل كانت مطمع للجميع
كانت الجرة الذهبية والفيل الأبيض
لكن السؤال
هل نحن مستعدون وقادرون على وضع هؤلاء الطامعين في أحجامهم الحقيقيه؟

تحياتي

Alexandrian far away said...

أهلا يا مهند باشا
أهلا بعودتك بعد الغيبه يا سيدي
أنا شخصيا مش معترض على الأقتحام لأنني اعلم أنه بتدبير وتخطيط وموافقه مصريه
لكن شيئا ما يبقى بالقلب

وأنت دائما مرحب بك يا مهند

Alexandrian far away said...

عزيزي مارفل
لك حق طبعا في تعجبك من أننا تقريبا لم نضف أي شىء لسيناء منذ أسترددناها، وكأننا فعلا ما دفعناش تمنها دم وأرواح

لكن حنقول أيه
لما الهكسوس يطلعوا من مصر نبقى نعمر سيناء ونبني فيها على مزاجنا

لكن بجد أنا مش مصدق موضوع الفوضى اخلاقه ده تقريبا هي فوضى بس بسبب عجز الأمريكان سخافة تفكيرهم
لكن عشان يداروا على الخيبه
قاموا سموها خلاقه
قال يعني هما الي قاصدين يعكوها زي أكل الفراخ كده


تحياتي

77Math. said...

بجد لما موضوع الحدود دا حصل اتخيلت الفلسطينيين عادي عايشين معنا..وسرحت أكثر، أخيرا سيتخلصوا من عناء الاحتلال..
ثم.. سمعت في الأخبار الفضائية أن اسرائيل تحشد قواتها في الجنوب عند الحدود مع مصر، هل تقوم الحرب؟
هل نصبح كالعراق وغيرها وغيرها ؟

ما الذي يحدث حولنا؟

الحقيقة دائما عبارة عن فضيحة !

Alexandrian far away said...

عزيزتي
77Math.

أتمنى تكون الأمتحانات عدت على خير
الحقيقه أنا أشاركك حيرتك
فعلا يوجد الكثير من المخفي والسري والمسكوت عنه
فعلا مستحيل نقدر نحدد هما متجهين لفين أو أيه ممكن يحصل
صحيح حكومات شفافه

تحياتي