Tuesday, January 16, 2007

باقى أبتعاد واشياء أخرى- لمصر لا لحبيب العادلي

الأسبوع الماضى رغم اننى لم أكتب شيئا فى المدونة إلا أننى كنت أدخلها يوميا واقضى فيها أوقات ليست بالقصيرة ، كنت أكدح محاولا تعديل الديكور الذى أتمنى أن يحوز أعجابكم، شفتم أنا باتعب نفسى أزاى عشانكم يا أعزائى القراء؟ولا تعب مبارك عشان الشعب المصرى ، المهم أنا لن أكتب اليوم فقط لكى أتفاخر بالديكور الجديد للمدونه بل للتحدث معكم وبهدوء شديد حول موضوع مهم جدا ألا وهو موضوع الشرطة فى مصر وحوادث التعذيب المزعومة والتى تمتلىء بها المدونات ، والمشكلة المؤلمة لأى قلب رقيق وأى مشاعر مرهفة كقلوب ومشاعر اشاوس وزارة الداخليه العين الساهرة على أمن الوطن والمواطن بما أن الشرطة والشعب فى خدمة الوطن و الحقيقة أن أخطر ما بتلك المدونات التى يكتبها ناس ما بيحبوش مصر خالص هى أتهاماتهم الجائرة وتجاوزاتهم اللفظية ضد السادة رجال الداخلية من أصغر مخبر إلى أكبر لواء أولا وإحقاقا للحق تعالوا نتكلم بهدوء عن كيف يصل الباشا الظابط إلى منصبه وكيف هى رحلة العرق والدموع فى سبيل تعليق الدبوره ( النجمه ) على كتفه الكريم ، أولا يبدا الباشا - قبل أن يكون باشا- كمتخرج من الثانوية العامة ، والمتخرج الذى يحلم بالألتحاق بكلية الشرطة - أكاديمية مبارك للعلوم الشرطية- هو واحد من أثنين : إما حاصل على الثانوية بمجموع ضعيف نتيجة لإنخفاض مستوى ذكائه الذى جعل الدروس الخصوصية عديمة الفائدة فى أختراق طبقات ( الجلخ ) المتراكمة على مخه ، أو أنه صايع وبايظ وتلفان ومش فاضى للتعليم اصلا ، وفى هذه الحالة فإنه يلجأ لكلية الشرطة لأن الكليات المخصصة للمواطنين لن تقبله بمجموع درجاته التافه ، الحالة الثانية هى حالة من حصل على مجموع يؤهله لدخول كلية من كليات المواطنين لكنه يرغب فى كلية الشرطة بحثا عما تقدمه من مميزات أولها فرصة خدمة الوطن طبعا خاصة لوكان الله قد منحه جسم بسطة فى الجسم وعرضا للقفا ومساخة فى الخلقه
المرحلة الثانية هى تدبير الرسوم الخاصة بدخول الكلية والتى وصلت على أخر ما اعلم إلى الأربعون الف جنيه تدفع هنيئا مريئا على قلب اللواءات المحترمين الذين يحرصون على دخول أولاد الناس المحترمة فقط معية رجالات الداخلية دونا عن أبناء الزعر والحرافيش من أبناء المواطنين العاديين، طبعا أنا مثلى كمثل أى مواطن مصرى لا أعلم شيئا عما يدور داخل اسوار أكاديمية الشرطة مصنع الرجال ولا الحربيه هى مصنع الرجال باين؟! خلاص تبقى ورشة الرجال أو فابريكة الرجال، المهم أن الشاب الأمور أبن الناس الى دافع دم قلبه بيقضى يا عينى أربع سـنوات فى الأكاديميه وبينزل أجازه خميس وجمعه محلوقه له راسه زى النسناس ولابس بدله ميرى زى بتاعة بوابين الفنادق ، وأكيد أى حد راقب تصرفاتهم حيلاحظ أنهم بيتميزوا بقدر من التفاهه وعدوانية المراهقين لا يتوفر فى طلبة الجامعات الطبيعية ، وليس ذلك بالأمر العجيب حيث أنهم مراهقون ذكور محشورون فيما يشبه مؤسسة عقابية أو مصح للمرضى العقليين بمعزل تام عن الأختلاط وخاصة بالجنس الأخر ( افتكروا النقطه دى) ، المشكلة الأساسية فى المنهج السرى بفابريكة الرجال فىأكاديمية الشرطة هو أنه طوال اربع سنوات بدلا من التفرغ لتعلم شيئا مفيدا يؤهلهم ليصبحوا شرطيين فإنهم يقضون السنوات الأربع فى دراسة القانون للحصول على ليسانس حقوق يضيفونه لبكالوريوس العلوم الشرطية ، ودراسة القانون دراسة صعبة معقدة تستهلك من الطالب العادى اربع سنوات بشق الأنفس، لكن طبعا السوبر مان الذى سيتحول طافرا بعد ذلك إلى الباشا الظابط يمكنه الحصول على كلا الشهادتين وخلال اربع سنوات فقط...فما النتيجة؟
جاهل يحمل على كتفيه نجمة يتخرج فى احتفال مهيب دون أى يحصل اى معرفة تؤهله للعمل الذى سيقوم به ولا حتى تأهيل بدنى ويكفى للتدليل على ذلك كروش الأمامير البطابيط المتمددة فى البدل الميرى .
نترك الباشا الظابط الذى تحول طافرا عن الشاب ذو قصة الشعر النسانسية يدخل إلى موقعه فى قسم الشرطة وبالحلقة القادمة نرصد وجوده بالقسم وتحوله لبطه رسمية طافرة مفترسة

1 comment:

cadet said...

اسمحلى اقول رايى
ماهو المدونات دى برضه عشان نقول راينا
بس اسمحلى اقتبس كلامك

اولا حضرتك بتقول (والمتخرج الذى يحلم بالألتحاق بكلية الشرطة - أكاديمية مبارك للعلوم الشرطية- هو واحد من أثنين : إما حاصل على الثانوية بمجموع ضعيف نتيجة لإنخفاض مستوى ذكائه الذى جعل الدروس الخصوصية عديمة الفائدة فى أختراق طبقات ( الجلخ ) المتراكمة على مخه ، أو أنه صايع وبايظ وتلفان ومش فاضى للتعليم اصلا)
طب على اى اساس علمى بنيت تقسيمك ده يعنى انت عملت بنفسك احصاء ولا ايه مش واخد بالى او جمعت المعلومات دى كلها ازاى يا ترى تعرف ان فيه ناس فى كلية الشرطه دى فوق ال 95% هتقولى ودخلو شرطه ليه اكيد زى محضرتك عارف ان اصلا مفيش فرص عمل لاى تخصص وبالتالى الشرطه مجال كويس وشغلاننه محترمه وفيها فلوس صحيح مش كتير بس احسن ميعقد على القهوه او ع النت يكتب مدونات ضيف لكده ان فيه ناس فعلا بتبئا عاوزه تعمل حاجه _طبعا حضرتك متعرفش عنهم اى حاجه - متعرفش غير الفاسدين منهم متعرف مين مات شهيد وهو بينقذ واحده من الاغتصاب =مش كان يمكن تكون دى اختك او امك= متعرفش مين مات ع الحدود وهى بيمنع دخول مخدرات البلد +مش يمكن كان المخدرات دى وصلت لاقرب الناس اليك=و متعرفش مين رفض رشوه بملايين متعرفش مين بيراعى ربنا متعرفش مين ابن ناس بيفضل محافظ على تفكيره ومحدش بيلعبله فيه لكن تعرف مين وحس وده عادى عندنا ديما بنبص على الجانب الوحش +لو تفتكر طه حين قالو عليه كافر لما كتب اولاد حارتناوالغريبه انه اصبح مسلم لما خد جايزه نوبل)

ثانيا حضرتك بتتريق على كلية الشرطه ومش عارف اذا كانت ورشه ولا مصنع بس افتكر لو عرفت تستحمل يوم هتعرف ازاى بتصنع رجال

ثالثا اللبس الميرى او البدله
ودى طبعا بدله عاديه خالص زى اى بدله حضرتك بتلبسها قميص ابيض وكرافته سوداء وجاكت وبنطلون من انضف محلات بدل ف مصر (lorenzo)
كل الفرق بينها وبين البدله العاديه شوية اكسيسوارات وافتكر اليونيفورم بتاع الشرطه المصريه له هيبته بشهادة الناس كلها

رابعا حضرتك بتتكلم على الاجازات لو ركزت شويه هتلاقى ان مجمل الاجازت ف السنه الدراسيه يزيد عن 4 شهور مابين اجازه مزاكره واجازة نص السنه واجازه اخر السنه وده بيدى طلبه كلية الشرطه تختلط بالناس وبالجنس الاخر زى منت بتقول وعمرى ماشف طالب كلية شرطه ماشى زى النسناس يشد فى البنات اما بالنسبه للحلقه الميرى فدى بيحلقوها ف اى حته فى الجيش والشرطه كمظهر من مظاهر الانضباط ولو ركزت شويه هتلاقيها موضه بص كده ع اعلانات بيبسى بتاعة عمرو دياب

خامسا ليسانس الحقوق
بياخدوه ازاى وهو عندوا مواد شرطه وطوابير عمليه
والرد بسيط هو تنظيم الوقت
حضرتك لو فى كليه عاديه مبتحضرش محاضرات طول السنه
طالب كلية الشرطه بيحضر المحاضرات بتاعته من اول يوم ف السنه ودى حوالى 6 ساعات
انت لو ف كليه عاديه مبتذاكر ش غير اخر اسبوع
طالب كلية الشرطه بيذاكر كل يوم 3 ساعات او بالفعل التلت ساعات مهيئين للمذاكره ومتنياش ان طال كلية الشرطه متفرغ للدراسه طول الاسبوع ولا بيخرج مع صاحبته ولا بيروح النادى
ولو ركزت ف النتايج هتلاقى 40 % بينجحو بتقدير جيد جدا

سادسا مساله الكروش دى مش ف كل الناس ودى مش مسئوليه الكليه يعنى مفيش طالب بكرش كون انه بيسيب نفسه بعد ميتخرج مش غلطة الكليه
- حفلة التخرج دى الطالب بيعملها بنفسه وافتكر مفيش حد تانى يعرف ينفذها يعنى سيادتك مثلا تعرف تركب خيل وتوطى تجيب حاجه من ع الارض وتطلع تانى
سيادتك تعرف تنط من فوق 12 واحد من غير متلمسهم تعرف تنط من فوق عربيه
اكيد لا لان دى خلاصه 4 سنين تدريب

اما فرحته بالدبوره ف دى طبيعيه بعد 4 سنين ومتنساش فرحه اهله بيه وانت لو ليك حد قريبك حتحس بده


اتمنى ان حضرتك تنشر ردى وياريت ترد عليه بس تبنى كلامك على حقائق مش كلام والسلام