Sunday, April 05, 2009

هؤلاء...



في تدوينته الأخيرة وصف الصديق العزيز أبوفارس تدويناتي بأنها غاضبه والحقيقة أنني أعتقد أن الغضب هو العاطفة الوحيدة التي قد
يسمح بها لنفسه أي شخص مبتلى بضمير حي

1- مطاط وقداسه:
الحق أقول لكم أنني صرحت أكثر من مرة أنني معجب - وبعمق-
بالكاثوليكيه أو بالتحديد (الكنيسة الرومانية الكاثوليكية), وأسباب أعجابي بها متعددة ومتنوعه, فهي كنيسة روما بكل ما تحمله الكلمة من معاني, فهي كنيسة الأمبراطورية التوسعية العسكرية , الكنيسة التي تحمل بيد سيفا وبالأخرى كيسا من الذهب, الكنيسة التي أعطت لوصية (لا تقتل ) معنا فريدا فأحرقت المئات لكي تطهرهم من التجديف والخطيئة ووضعت بمحاكم التفتيش ومفتشيها في العصور الوسطى القواعد الأساسية التي ستتبعها كل أجهزة القمع البوليسية في التاريخ , وقام أتباعها الأكثر تقوى بجزر وذبح شعوبا كاملة وأبادوا حضارات عن بكرة ابيها لهدايتهم للطريق القويم, وهي مؤسسة مدهشة فعلا استطاعت أن تحتفظ بكل تراث العصور المظلمة الأوروبية وتنجو به عبر كل محاولات تدميرها, وعبر حروب الإصلاح الديني وثورة عصر النهضة, وكل التطور الفكري والفلسفي البشري, كل ذلك لم يمسها في شىء, بل بقيت حية عابرة للعصور كحفرية حضارية بكل ركام العصور المظلمة , بقيت الكنيسة الرومانية الكاثوليكية مزهوة بكل دماء المفكرين والأحرار الذين قتلتهم وبكل صرخات الألاف اللذين لاقوا حتفهم تحت التعذيب المقدس, بقيت الكنيسة الرومانية الكاثوليكية الموشاة بالذهب من أخمص قدميها لقمة تاج باباواتها أمينة على تعاليم المسيح الذي أعتقد أنه لم يمتلك في حياته أكثر من ثوب ورداء خشنين, ومن أهم مظاهر عبقرية الكنيسة الرومانية قدرتها الفذة على ممارسة أحط الألعاب السياسية وأدنأ المؤامرات مع أحتفاظها بأحساسها العميق بالقداسة وممارسة تلك البشاعات تحت تأثير تقوى طاغيه, وهي المؤسسة التي طورت مفهوم (الديماجوجية) وحولته لفن وعلم قائم بذاته, كما أنها وضعت القواعد الإحترافية لصناعة وتحريك الغوغاء وهي الجموع البشرية المهتاجة عاطفيا بتأثير وعي زائف, وأستخدمتهم لقمع وتدمير القوى المعادية لها, بل قمع وتدمير القوى المستنيرة والتحررية عبر التاريخ, وحتى في القرن الأخير ظلت تلك المؤسسة الحفرية تلعب دورها النشط في مكافحة التحرر والحرية إجمالا فكان البابا الأخير يوحنا بولس الثاني خير حليف للمخابرات الأمريكية في صراعها مع اليساريين عبر العالم, لكنني لم أهتم حقيقة كثيرا بالباباوات حتى تم تنصيب البابا بندكيت السادس عشر, فالرجل جوهرة نادرة, هو خوميني كاثوليكي, روح من العصور الوسطى بعثت في القرن الحادي والعشرون, فمنذ بداية توليه شن هجوما لفظيا عنيفا على كل من الإسلام والكنائس المسيحية الأخرى متخليا عن التسامح الناعم لسابقه وكاشفا الوجه الحقيقي لكنيسة روما المحاربه, على الأقل كان الرجل واضحا حاسما مكشوف الوجه, لكن قداسته نسى أن العالم قد فصل ما بين العلم والميتافيزيقا منذ قرون طويله- يحاول مشايخنا بارك الله فيهم تصحيح هذا الخطأ التاريخي بجهود لا تكل- لذلك أتحفنا قداسته قبل ايام بتصريحه المقدس بأن
العوازل الطبية تزيد من أنتشار مرض الأيدز

ضاربا عرض الحائط بكل الأدلة العلمية الطبية, وشاطبا سنوات طويلة من الجهد والمال للترويج للعوازل الطبية كحائط صد أخير ضد الأيدز الذي يكتسح أفقر مناطق العالم كوباء, قداسته أعتبر أن عقيدته الكاثوليكية الرومانية أهم من أتباعها وبما أن تلك العقيدة تعتبر موانع الحمل من أعمال الشياطين, فلا بأس من أن ينتشر الأيدز بين ملايين البسطاء الذين سينسون طبعا مقولات العفاف والنقاء ويتذكرون فقط أن العازل الطبي لا فائدة له

الحقيقة يجب أن نتسائل كيف يمكن لشخص يمتلك كل هذا النفوذ أن يفتقر للأحساس بالمسئولية لهذا الحد؟

2- ورق ونار وتطهير ديني


أعلموا رحمكم الله وعافاكم أن بمصر المحروسة سبوبة هي أصدار الصحف وأن فيها من يمتهنون حرفة تسمى (الصحافة) والغرض منها الذي يدل عليه أسمها هو ملء الصفحات التي تكون تلك الصحف, ملئها بماذا؟ مش مهم المهم أنها تتملى, ومن عجائب الدهر وغرائبه أن لأبناء تلك الحرفة الميمونة جمعية تسمى (نقابة الصحفيين) أو الصحفجيه , ولتلك الجمعية مجلسس للإداره ومن بين أعضاء ذلك المجلس صحفجي يدعى (جمال عبد الرحيم) يبيدو أنه يخلط ما بين (صحفجي) و(بلطجي) فهو صاحب صولات وجولات وفتوحات وغزوات أخرها تصديه بفتونة منقطعة النظير لمؤتمر حرية الأديان الذي كان مقررا عقده بمقر النقابة - بتاعة الصحفجية- في 11 أبريل من العام الماضي وقام تقريبا بالأعتداء على نقيب الصحفجية (مكرم محمد أحمد) - أيوه الراجل الكباره بتاع الحكومه أبو شعر أبيض-, وفي أبريل من عامنا هذا كان لجمال عبد الرحيم وقفة جديدة حيث تلبسته روح مفتشي محاكم التفتيش الرومانيه فقام يرغي ويزبد في برنامج تلفزيوني متهما البهائيين بالردة ومحرضا على قتلهم, وكانت تلك هي كلمة السر التي قام على أثرها عدد من الحثالة والمجرمين بمهاجمة منازل البهائيين في واحدة من قلاع الفقر والتخلف بمصر والشرق الأوسط (محافظة سوهاج) وعليه أضطر هؤلاء النفر من البهائيين للهجرة من القرية التي أضطهدهم أهلها لأرض الله الواسعه, وقامت الحكومه - أي والله فيه حكومه في مصر وفي أسيوط كمان- بتشميع بيوتهم؟
مبارك لأرض مصر ولشعب مصر أن أعاد مسلموها أحياء سنة أسلافهم المسيحيين وأضطهدوا المخالفين في الديانة وأحرقوا بيوتهم وحرضوا على قتلهم, وكما ذبح المسيحيين المصريين أخوانهم الوثنيين تقوة وورعا قبل 16 قرنا, هكذا يفعل المسلمون من قبط مصر ويحرقون البهائيين, مباركة هي أرض مصر ومباركة تقواها وورعها, ومبارك البلطجي الصحفجي المحرض على القتل - هي دي مش جريمخه يعاقب عليها القانون؟- ومباركة هي الحكومة التي أرسلت بلطجيتها وأزلامها لتأديب البهائيين عقابا لهم على الحكم الخائب الأعرج الذي حكم به لهم ببطاقات خالية من غير سوء من الديانة, ومبارك من مدح الفعلة ومبارك الذي علق قائلا أن مصر للمسلمين والاقباط فقط لأنه من الليبراليين الإسلاميين فلم يقل أنها للمسلمين فقط

ممكن سؤال؟
غالبا لا يتوقف المسيحيين المصريين عن الضجيج بخصوص الأضطهاد الديني الذي يلاقونه من المسلمين في مصر, ولا يتوقفون عن المطالبة بحرية التدين التحول الديني, فلماذا لم يسمع لهم أي أحد اي صوت بخصوص اضطهاد البهائيين؟
أختر أجابة:
أ - المسيحيون المصريون لا يقرأون الجرائد ولا يشاهدون التلفزيون ولا يعرفون شيئا عن الموضوع
ب - المسيحيون المصريون موافقون على أضطهاد البهائيين
ج - هم يقصدون بحرية الديانة حرية ديانتهم هم فقط وليس أي ديانة أخرى
د - هم بأغلبهم موالسون مع الحكومة ولا يخالفونها في أي شىء بما فيه الأضطهاد الديني لغير المسيحيين

3-المزيد من التطهير الديني

ومرة أخرى مع الباباوات وهذه المرة مع البابا المحلي
البابا شنودة الثالث، بابا الإسكندرية بطريرك الكرازة المرقسية - يا نهار أسود ده أنا حأدخل نفسي في مصيبه- صرح قداسته قبل ايام التصريح التالي (توجد خطايا عارضة وخطايا خطيرة، فمثل من يعمل فى صناعة التماثيل والأصنام، وما شابهها من أعمال، لا تقبل عطاياه، مثلها مثل الربا، والمرأة الزانية التى تعيش فى الزنا لا تقبل عطاياها), مساويا ما بين النحاتين وما بين الزناة والمرابين, أي أن مختار والسجيني ومايكل أنجلو وهنري مور يتساوون مع الزناة والمرابين, وعليه فإن أقسام النحت في كليات الفنون الجميلة تروج للخطيئة وتخرج أشباه المرابين والزانيات, وعلليه فإن مثلي كمثل الزاني والمرابي لأني أمارس النحت أحيانا

هاهنا يا أخواني نرى نموذجا رائعا للتأخي ما بين الأديان والتواصل ما بينها, ولعل العاملين على التقريب بين الديانات ينتبهون لهذا القدر من التقارب ما بين فتوى البابا وفتوى هؤلاء
سؤال خارج المنهج: هل معنى هذا أن الطلبه الأرثوذكس لن يدخلوا قسم النحت بكلية الفنون الجميله؟ وتبقى أقسام للمسلمين فقط؟ ونحط عليها شعار اسلاميه اسلاميه ونسلم شعبة النحت في نقابة التشكيليين للأخوان المسلمين؟


4- المقص والبلاط منذ وعيت على الدنيا وأنا أرى كورنيش الإسكندرية بمنطقة محطة الرمل مفروشا بقطع من بلاط حجري مميزة الشكل في تكوين أصيل يوحي بالعراقة والقدم, ولسبب ما قام السيد اللواء محافظ الإسكندرية -حماه الله- بإزالة هذا البلاط الحجري النادر مستبدلا اياه ببلاط أسمنتي حقير وسخيف, طبعا المحافظ حر في محافظته يفعل بها ما يريد, لكن السؤال : هو البلاط ده راح فين؟ هو صحيح كما يقول بعض المغرضين أنه تم تصديره لأوروبا؟ طيب لو تم تصديره فعلا راحت فين الفلوس؟

بس...خلاص

log In NAME & PASS WORD -5

بمناسبة أن غدا ميعاد ثورة الفيسبوكيين العظيمة تنتشر بالشارع المصري إشاعات بأن كل شخص يجب أن يدخل ال لوجين نايم والباس ورد قبل الأنخراط في المظاهره,
وهو ممكن الساده الثوريين الفايس بوكيين العظام يقولوا لي ما هو الهدف من مما سيفعلونه غدا؟
يعني أيه أهداف التحرك ده وأغراضه وتخطيطه والكلام الكبير المعقد بتاع الكلاكيع ده, على فكره لو الموضوع باظ مش حينفع تعمل REPLAY THE GAME
يالا كل مولد 6 أبريل وأنتم طيبين وكومبيوتراتكم خاليه من الفيروسات
سؤال خارج المنهج:
هي حركة الأشتراكيين الثوريين حتشترك بمين؟ بأعضائها المباحث ألي سلموا زمايلهم ولا بالأعضاء المتسلمين؟
مجرد سؤال برىء

يالا
صباح الخير

ياسر


16 comments:

Hypatia said...

كالعادة
استمتع بكل كلمه بتكتبها يا ياسر
واحشني و باتمني تكون بألف خير

Unknown said...

بيسمو البلاط ده حجر الاسكافي المحافظ شاله علشان هو قديم ومتكسر وشكله مش حلو انما البلاط الجديد ملون وعريض ومحمل ولو انكسر تحتيه اسمنت يعني منه فيه وكل تلاته اسكافي بواحد ملون(نشاط تجاري يعني)وبلاش تحامل علي الناس

ِوحيد جهنم said...

تدوينة فى الجون كالمعتاد وعلى رأى اول من علق على التدوينة انا ايضا استمتع بكل سطر اقرأه فى تدويناتك
بالنسبة لفتوى الحج شنودة ودى اكتر حاجة لفتت نظرى فى تدوينتك الرائعة ياترى رأى القمص نجيب ساويرس ايه فى الكلام ده وهل يجرؤ ولو للحظة انه ينوه ولو مجرد تنوية على فتوى الحج شنودة كبير القبط فى قناته الغراء on tv خصوصا ان البيه خصص حلقة فى احد برامجه - مش فاكر اسم البرنامج - للهجوم على الاسلام اللى بيحرم الرسم والنحت للموديل العارى . على ىالعموم ما اسخم من سيتى الا سيدى زى ما بنقول.
تحياتى ومودتى واحتراماتى

بنت القمر said...

اسكندراني
=============
بالنسبة وتحالف رجال الدين والسلاح
يعني الحقيقه لسه كان في نوت لطيفه علي الفيس بوك
حتي انا اديت لينكها لنسرين اسمها رساله الي الاخوة الملحدين
كانت بتتكلم عن هل العصبيه مرتبطه بالدين ام ان العصبيه هي طبع متأصل في الانسان يعني بيتعصب لقومه و للونه او لنادي كورة معين وممكن يقتل لعصبيته ورغم اقتناعي ان الدين المفروض انه نزل لتهذيب سلوك البشر
ولنشر مكارم الاخلاق
الا اني برضه مقتنعه انه بقي من اهم اسباب العصبية والهمجية والعدوانيه
سواء في الشرق الاوسط او في الغرب
-بالنسبه لجرايم العصور الوسيطه التي ارتكبت باسم المسيحيه وخصوصا في الاسكندرية من اباده المصريين القدامي عباد سرابيس ورع
يعني الحقيقه انا مش لاقيه اي تفسير ليه التعتيم عليها
في حين بيتحط الف مليون خط تحت نفس الجرايم اللي بترتكب من مسلمين بحجه الدين
يعني هل لان موازين القوة في العالم الان مش في صالحهم
الفكرة طبعا مش كل فريق يعلّم علي التاني ابدا
_لكنفي اكيد نوع من المصلحة المستترة
وده يفسر الهيستيريا اللي انتابت الكنيسه المصريه من روايه عزازيل
وام تفتيح المخ اشتغل وها يؤلفوا !!!روايه مضادة
- برضه من الامور العجيبه اتفاق الديانات الثلاث "الاصوليه"علي العداوة للفن والاقصاء للمرأة
يعني في كمية تشابه عجيبه كأنهم توأم ثلاثي ملعون
بيفكر بنفس المنطق وده تعليقا علي فتوي البابا اللي برضه ها يتم التطميس عليها!
فكرتني بخبر اخفاء الاحزاب اليمينية لصور الوزيرات الاسرائلييات في اي اجتماعي حكومي وبيستبلوه بلطخة سودا
رغم انهم بيكونوا لابسين بدل وتاييرات محتشمه جدا
وغيره وغيره
اخيرا ومعلش طولت
انا بس بختلف في نقطه جمال عبد الرحيم
انا شايفه ان اللي حصل نار مكنتش محتاجه شرارة
حادثة كرموز بتاعه المسلم اللي المسيحيين قتلوه
ورغم انهم كلهم شويه صيع ومدمنيين وفي منطقه اجرام
الا انها اتحولت الي فعل طائفي بمجرد ان واحد من مشيعي الجنازة قال ها يموتوا
! يعني الناس مستنفرة ومستفزة ومش محتاجه الفكرة مش في برنامج ولا صحفي والحقيقه انا مشفتش الحلقه بس اعتقد اننا بنمر بحاله من التشرذم والتحزب والاستنفار الشديده بسبب حاله الاهتراء الحكومي والامني
بتخلينا علي سطح قابل الللانفجار
موقف المسيحي المصري مختلط جدا البعض اخدها حجه واثبات علي همجية المسلم ضد غير المسلم والاخر زي ما بتقول كبر ولانه الغالبيه الساحقه من المتحولين الي البهائيه متحولين من الاسلام وليس من المسيحية
يعني الحقيقه مستقبلنا غامض جدا جدا ومؤسف
والواحد مش شايف اي امل وحتي بانتهاء حكم مبارك لا اتوقع اي نوع من التحسن لان العقلليات اللي في البلد محتاجه اجيال عشان تتغير وتغير حال البلد وعليك خير
تحياتي

il sognatore said...

بالنسبة لوقف المسيحيين فى مصر من البهائية .. أعتقد أنهم متعاطفون معهم الى حد كبير ولكنهم يخشون الدفاع عنهم علانية حتى لا يتم وضعهم فى سلة واحدة مع البهائيين ويتهموا بمحاولة تدمير الاسلام وما الى ذلك .. أنا مسيحى لكنى لا أتحدث بالنيابة عنهم وأرى مشكلة كبيرة جدا عندنا جميعا وهى مشكلة قبول الاخر

وشكرا على تدويناتك الرائعة

Alexandrian far away said...

عزيزتي نسرينا
لك وحشه فعلا
ولك عزومة سمك معتبره نعزمك عليها أنا ومراتي ساعة تشرفين الإسكندرية بزيارتك
تحياتي ومودتي

Alexandrian far away said...

وهل أجرؤ يا سيد شمعون على أن أتحامل على سعادة الباشا الوزير اللواء المحافظ؟
ده متحامل على محافظه بحالها
ولك حق والله فعلا القديم كان شكله وحش
يا ريت بالمره يكسي لنا سور الكورنيش سيراميك بوزره

نورت يا باشا

Alexandrian far away said...

عزيزي وحيد جهنم
أشكرك على مديحك
فتوى البابا ليست بالأمر الشاذ فهي تتسق تماما مع المواقف الرجعيه الحجريه لكل رجال الدين في مصر - اي دين- وصح كلامك ما أسخم من سيدي إلا ستي

فين يا عم تدويناتك؟

تحياتي ومحبتي وأحترامي

عباس العبد said...

-1-
مبدئياً ما ادلى به البابا لم يكن تصريح بل تعليق أثناء زياراته للكاميرون و دول أفريقيا . و كان بيعلق على على مرض الأيدز الذى وصفه " وباء قاسى لا يقتل فقط , و لكنه يشكل تهديداً أجتماعياً و اقتصادياً للقارة " , و علق قائلاً : " أن وقف انتشار الأيدز ينبغى أن يكون عن طريق الأخلاص و العفة و ليس عن طريق الواقى " .. و قال ايضاً " أن نسيج أفريقيا , الذى هو مصدر للأمل و الأستقرار , أصبح مهدداً بالطلاق و الأجهاض و البغاء و التجارة بالبشر و عقلية منع الحمل " , ثم قال تعليق على الواقى اللى انت ذكرته : العوازل الطبية تزيد من أنتشار مرض الأيدز .. ( يعنى القصد واضح .. الراجل بيقول ان محاربة الأيدز ينبغى ان تكون بالأخلاص و العفة و ليس عن طريق الواقى .. لأن الواقى بيساعد على انتشار الجنس المفتوح " الأمن " دن وازع دينى او اخلاقى ) , و الطبيعى أن الكنيسة , المؤسسة الدينية , تكون ضد الجنس المفتوح و الجنس الأمن اللى هو خارج مؤسسة الأسرة ( و أعتقد أن الأسلام ضد الجنس المفتوح و الأمن برضه ) , الرجل لم يدلى بتصريح علمى بل " تعليق دينى " يحمل رؤيته للصلاح و ده طبيعى من رجل دين و بابا لكنيسة .
اللى حضرتك عملته انك نشرت جملة ملهاش علاقة بالحوار الأصلى , مارجعتش للنص الأصلى و ده يقودنا الى النقطة التالية
-2-
هو حضرتك بتثق بوسائل الأعلام المصرية ؟ يعنى انت نقلت الخبر أكيد من وسائل الأعلام المصرية , لو حضرتك بتثق بها و شايف أنها مصدر جيد و وسيلة جيدة لأطلاق الأحكام , و ده اللى أعتمدت عليه فى نقل الخبر , فممكن نبعت للصحف المصرية و ممكن كمان نبعت للسيد جمال عبد الرحيم , نشوف رأيهم فى بعض تدوينات حضرتك زى " بتاعة التنين ابو تلات رؤوس " و نشوف تعليقهم " هل ده يعتبر حرية فكر أم ازدراء أديان " , زى ما حصل مع مجلتك الأثيرة إبداع !! .
-3-
اللى قلته فى نقطة جمال عبد الرحيم , فيه تضليل للقارىء , لأنك يسارى و اللى حصل ده هو نموذج للتحريض اللى بيتمناه اليساريين فى مصر ( عبد الحليم قنديل كنموذج ) . مقالة تثير الرأى العام , الجماهير تتحرك او نقدر نقول ( البروليتاريا و المثقف العضوى او النوعى ) . و بالتالى عيب انك توصف البروليتاريا و الشغيلة ب" الحثالة و المجرمين " !! .
اما بالنسبة لأن المسيحيين معملوش حاجة أو مش ضد ما حصل للبهائيين . مين قال لحضرتك كده ؟ ما انا مسيحى و ضد ما حصل للبهائيين و كثير من المدونين المسيحيين ضد ما حصل للبهائيين . و لا أنت عايز البابا شنودة و لا ألأنبا بيشوى و لا الأنبا موسى يخرج يدلى بتصريح رسمى للاكليروس الأورثوذوكسى يقول فيه أن الكنيسة ضد ما حصل للبهائيين !!! ؟؟؟ . علشان امثال محمد عمارة و كل المتعصبيين يخرجوا يقولوا أن البابا و الكنيسة بيصطادوا فى المية العكرة و بيلقحوا بالكلام . يا ريت نفكر شوية فى التوازنات و ردود الأفعال و منبقاش مسخناتية مش فاهمين الأحتقان اللى فيه البلد .
و ده يقودنا الى النقطة التالية
-4-
انا مقدرش افيدك افادة كاملة لموضوع تحريم النحت و ان كنت " اعتقد " ان فى حاجة غلط فى الموضوع ده , لأن الكنيسة بتصلى فى عيد الميلاد و هى عاملة " مغارة " فيها تماثيل ليسوع الطفل و العذراء مريم و القديس يوسف , فانا مش فاهم التصريح للأمانة و ان كان ممكن التأكد منه من الكاتدرائية .
-5-
مفهمش فى قصة البلاط للأمانة , و متفق معاك فى موضوع الأضراب اللى احتمال من كتر تكراره , الحكومة نفسها تعمل له ذكرى سنوية و ناخد اجازة فى نفس الميعاد كل سنة ....
-6-
ملحوظة اخيرة ..
حضرتك قلت فى مقدمة التدوينة , " في تدوينته الأخيرة وصف الصديق العزيز أبوفارس تدويناتي بأنها غاضبه والحقيقة أنني أعتقد أن الغضب هو العاطفة الوحيدة التي قد يسمح بها لنفسه أي شخص مبتلى بضمير حي "
و دى مغالطة كبيرة , لسبب بسيط هو أن الصفة لا تحمل دلالة أكثر من ذاتها . يعنى كونك غاضب لا يعنى انك تملك " ضمير حى " كما قلت , فالسيد جمال عبد الرحيم كان غاضباً عندما أدلى بتصريحاته عن البهائيين , و من حرقوا منازل البهائيين كانوا غاضبين , الشعب الأسرائيلى كان غاضباً على الجيش عندما فشل فى تحقيق اهدافه فى حربه الأخيرة على غزة و امثلة كثيرة . و بالتالى الغضب ليس دليلاً على " ان الغاضب يملك ضمير حى " .

و شكراً لنشر التعليق

Alexandrian far away said...

الأستاذه بنت القمر
جمعتي فأجملتي
تعليقك اضافة مميزة للتدوينة

إن لم تخونني الذاكرة فللدكتور عبد الوهاب المسيري كتاب بعنوان (الأساطير المؤسسة لدولة إسرائيل) وأظن أن شخصا ما لابد أن يؤلف كتابا بعنوان (الأساطير المؤسسة للأديان)

تحياتي وأحترامي ومودتي

Alexandrian far away said...

عزيزي الحالم بالأيطالية الموسيقية الكلمات
:-)
ولماذا لا يعلن هذا التعاطف بصراحة؟
الخوف؟
ربما, لكنني أذكر صديقا أفترقنا منذ زمن طويل وثق في مرة وأسر غلي أنه ليس مسيحيا عاديا بل من شهود يهوه, وأن المسيحيين المصريين هم من يبلغون عنهم السلطات...ربما كان كاذبا
لكن حقيقة ألا يعد البهائي كافرا مخلد الروح في جهنم لأنه كافر؟

أما عن قبول الأخر فلا أعتقد ان الديانة تكفي - من وجهة نظري- لأن تمسخ انسانا وتجعله (أخر)

أشكرك على مديحك وسعدت بزيارتك وبالتعرف لمدونتك

تحياتي ومودتي

Alexandrian far away said...

عزيزي عباس

1- معلش النقطه الأولى طلعت منك أوت, وأنا لم أعتمد على المواقع الأخباريه العربيه لقراءة تصريح البابا, فنفس التصريح مذكور على مواقع أخبارية غير عربية أذكر منها
BBC NEWS:
Several EU states have criticised Pope Benedict for saying that the use of condoms could endanger public health and increase the problem of HIV/Aids.

Speaking during his first visit to Africa, the Pope said HIV/Aids was "a tragedy that cannot be overcome by money alone, that cannot be overcome through the distribution of condoms, which can even increase the problem".

YAHOO NEWS:
YAOUNDE, Cameroon – Pope Benedict XVI said condoms are not the answer to the AIDS epidemic in Africa and can make the problem worse.

You can't resolve it with the distribution of condoms," the pope told reporters aboard the Alitalia plane heading to Yaounde. "On the contrary, it increases the problem."

كفايه كده؟
هل هذه المواقع مخطئه؟
ببساطه أنت لم تفعل سوى تكرار السفسطه الخاويه من المضمون التي كررتها المصادر الكاثوليكيه دفاعا ضد الهجوم الكاسح الذي تعرض له البابا عالميا بهذا التصريح العجيب, وبغض النظر عن حقه في ترويج الاستقامة والعفة فغصب عنه أثبت علميا أن العازل الطبي يقي فعلا من الأصابه بالأيدز, والصراحه انا اثق في المطاط اكثر مما اثق في الطهاره والعفه

2- هل أعتبر نقطتك الثانيه نوعا من التهديد مثلا, أن سعادتك بتفكر تبلغ عن تدويناتي مثلا؟
صحيح كاثوليكي

3- بصراحه يا هندزه وبكل أخلاص ونقاء ضمير واحترام, أنت لا تفهم اي شىء على الإطلاق عن معنى يساري وطبقه عامله, ولا تعرف اي شىء نهائيا عن اليسار كفكر وتنوع أجنحته وفصائل, ومعلوماتك عن اليسار وأيدولوجيته وتكنيكاته لا تزيد عن ما يسطر في كتيبات التوعيه التي توزعها الكنيسه يوم الأحد, وهو جهل لو تعلم يمكن علاجه بالإكثار من الزبادي خلاط
والصراحه أنا أرى من يتبنى راي إما أن يعبر عنه أو هو ببساطة جبان
ومن أمتى الخوف ده؟
اليست الشجاعه في أبداء الموقف هي ما صنع عصور الشهداء؟
لكن حقيقة أعيد سؤالي : أليس البهائي كافر من وجهة نظر مسيحيه؟أسال ابونا عن الموضوع وأنا مستني أجابتك الأحد القادم

4- ماشي اسال لنا ابونا برضه عن موضوع النحت ده...فكره كويسه

5- واضح انك عمرك ما مشيت على الكورنيش في الأسكندريه يا هندزه

6- معلش فلتت منك دي كمان, أنا قصدت الغضب النبيل, الغضب العقلاني المستنير الذي يدفع صاحبه للحماس والشجاعة والحسم في ابداء موقفه والصلابة في الدفاع عنه, وليس الغضب الحيواني الديماجوجي الأعمى, وهو الغضب الذي تحدث عنه جون أسبورن في مسرحيته الشهيرة بالخمسينيات

عموما مازلت أنتظر منك المزيد
ربنا معاك
مع تمنياتي بالتفوق والنجاح الدائمين

حصلت البركه

عباس العبد said...

-1-
لو انت أعتبرت ان الرد ده سفسطة و انى بدافع عن البابا , فده مش صحيح لأن البابا يغلط ما يغلطش هو حر . لأن اللى قاله مش تعليم كنيسة و هو ما كانش بيدلى بتصريح علمى ده كان بيعلق على أنتشار الجنس و الفقر و الدعارة فى القارة الأفريقية و هو حر لأن ده تصريح دينى , انت عايزه يشرحلهم وسائل الحماية العلمية , الراجل بالوازع الدينى و بحكم منصبه بيتكلم عن العفة و الطهارة و الأخلاص . انت عايزه يكلمهم و يقولهم مارسوا الجنس المفتوح و الجنس الأمن , مارسوا الجنس خارج مؤسسة الأسرة بس خدوا بالكم و انتم رايحين بيت الدعارة , ابقوا وحياة ربنا عندكم و غلاوة المسيح عليكو , ماتنسوش تاخدوا معاكوا واقى ذكرى !!!؟؟؟ اسمحلى انت
يعنى ده كلام ما يخشش العقل
بابا كنيسة حيتكلم عن الجنس و الواقى الذكرى و لا العفة و الطهارة و الأخلاص ؟؟
اما انك تؤمن بالبلاستيك و لا تؤمن بالعفة
فدى مش مشكلته انك لا تؤمن بالأخلاقيات الأنسانية قد ما تؤمن بالأفعال المادية
و هو فعلاً لا يمكن وقف انتشار الإيدز بالواقى الذكرى , الواقى الذكرى بيمنع نقل الأصابة لكن مش بيعالج المرض ,
فى بعض الجمعيات فى مصر بتوزع على المدمنين سرنجات ضرب الحقن لأن أنتقال سرنجة ضرب من ايد مصابة لأيد أخرى ممكن تنقل الأصابة فعلشان يقللوا انتقال الأصابة بين المدمنين بيوزعوا عليهم سرنجات لضرب الحقن للمدمنين
ده معناه أنه " ادمان أمن " لكن مش علاج للأدمان
و دى ممكن تسئل فيها أى من المدونين اللى حضروا ورشة العمل بتاعة الأيدز اللى انا حضرتها السنة اللى فاتت
-2-
النقطة التانية مربوطة بالنقطة الأولى , يعنى انت لو بتثق بوسائل الأعلام فممكن نجرب معاك اننا نقتطع جزء من مدونتك و نرسلها للأعلام و نشوف رد فعلهم
يعنى انت سبت كل الكلام الكويس اللى قاله البابا عن أفريقيا و مسكت فى جزء من التعليق اللى قاله البابا , ففيه نوع من التحامل الغير مبرر
-3-
اما كونى لا افهم شىء عن كلمة يسارى و الطبقة العاملة , فشكراً بجد ده على أساس انك مقطع اليسار يعنى و مهربد الطبقة العاملة , فياريت تشرحلنا انت يعنى إيه يسار و طبقة عاملة ؟
عبد الحليم قنديل ما بيفهمش ؟ الأشتراكيين الثوريين ما بيفهموش ؟ بتوع التجمع و اليسار الوطنى ما بيفهموش ؟ الأشتراكيين الجدد ما بيفهموش ؟ الشيوعيين الجدد برضه زيهم ؟ الناصريين و بتوع الكرامة ما بيفهموش ؟
يعنى انت الوحيد اللى بتفهم ؟ خلاص اشرحلنا ينوبك ثواب
بالنسبة لحكاية ان البهائيين كفار من وجهة نظر مسيحية , فده غلط ( انا بتكلم من وجهة نظرى ك-كاتوليكى ) كل من يعبد الله هو مخلص و راجع نص الممع الفاتيكانى الثانى , ( خلاص غير المسيحيين ) , دى مش مشكلتى انك ما تعرفش حاجة خالص عن وثائق المجمع
و لو تحب اجيبلك النص مفيش مانع
-4-
روح انت الكاتدرائية أسئل
انت اللى ناقل الخبر
البينة على من أدعى يا أستاذ و الحلف على من أنكر
-5-
لأ , مشيت طبعاً
بس ياما بلاط اتشال و يا ما بلاط اتحط
و دى مش غلطتى انكم سايبين اسكندرية و مش عارفين تسيطروا
-6-
ما هو كمان كان فاكر انه غضب نبيل , و هم فاكرين انهم بيخلصوا البلد من كفار
يا سيدى الفاضل , أنت راجل مثقف و قارى و انت الوحيد الى فاهم فى اليسار , فالمفروض تبقى عارف أن الصفة لا تحمل دلالة اكثر من ذاتها .يعنى الجزء اللى انت كاتبه مش دليل على حاجة
لأنه ببساطة ممكن تكون موتور فبتهاجم الناس دى و ممكن تكون حقانى
مين يعرف يا استاذ ؟ انت يسارى و محدش يعرف غيرك يعنى ايه يساريين , انت بس اللى فاهم , فحنعرف منين اذا كنت حقانى و لا بتقبض من السفارة ؟

Alexandrian far away said...

عزيزي الباشمهندس عباس الشهير برامز

1- مرة أخرى تعيد السفسطه, وأنا لن أنخرط معك لأنني أعترف لك فعلا أن قدراتك على كلا من اللغو والغلو في الحديث تفوق قدراتي- معلش شباب بقى وطاقه وأنا بقيت عضمه كبيره-لكن الحقيقه أن الأستقامه برضه لا تعالج المرض إنما تقلل من أنتشاره مثلها كمثل العازل الطبي, إلا أنها طبعا من الممكن أن تعالج المرض إذا ألتزم البشر جميعا بالرهبنة التامة وبذلك يختفي المرض في خلال 100 عام على الأكثر لأنقراض البشر
:-)

2- الصراحه يا أخ رامز أنا لم ولا أرحب بزيارة البابا لأفريقيا- ومثلي العديد- فما هذه الزيارة من وجهة نظري إلا لأن كنيسة الرجل الأبيض تذكرت أنه ما زالت بعروق الرجل الأسود المزيد من الدماء القابلة للأمتصاص

3- الحقيقه يا أخ رامز أنا قلقت عليك حين قرأت الفقرة الثالثة من تعليقك, فأنا لم أقل سوى أن سيادتك كفرد لا تفهم أي شىء عن اليسار, ولم أذكر نهائيا أن أيا ممن ذكرتهم إلا إذا كنت معتبر نفسك - لوحدك- كل الناس دي بما فيهم قنديل, لكن بما أنك لا تعرف الفارق ما بينهم وكلهم بالنسبه لك يسار, كما أن كل ما يطير بالنسبة للأطفال (عصفوره) فأنت ما زلت تحتاج كم كبير من الزبادي الخلاط

عموما كفايه عليك كده
حصلت لنا البركه
:-)

عباس العبد said...

-1-
صحيح أن الاستقامة لا تعالج المرض , لكن الطبيعى انه لما يتكلم , حيتكلم عن الأستقامة
-2-
مترحبش بيه زى ما انت عايز , بس عامة هو بيرحب بأى حد و بيحب أى حد حتى لو كانوا أعدائه علشان كده انا متأكد من انه بيحبك و يرحب بيك جداً و بيتمنالك كل خير
-3-
و الهى مش انا اللى قلت ان كل دول اللى ما بيفهموش , انت اللى قلت قبل كده بما فيهم قنديل
على العموم
انا بعتذرلك عن لغوى و غلوى و جهلى
انا اسف

Alkomi said...

يا سلام انت بترد على شمون بتقوله يكسي لنا الكورنيش سيراميك

طب و نتمشى عليه ازاي في الشتا يابو خالو

كفاية بقى كدة من ظالم سفيه