Saturday, October 06, 2007

صباح 6 أكتوبر


صباح الخير
صباحك منور ومزهر يا بلدي
صباح الخير على الوادي والجناين والغيطان والبيوت والحيطان
صباح الخير ع المقابر والمنابر وع المقابر الي أعلى وأقدس من المنابر
صباح الخير على ترابك وطينك وحجرك
على نيلك وبحرك وجبلك
صباح الورد يا بلدي
يا عروسه مجلوه ليلة عرسها
عريسك دفع مهرك دمه وحلمه
صباح الخير يا أمي
يا ارضي
صباح الخير يا أخواتي الماشيين في الشوارع
صباح الخير يا أخواتي الراقدين تحت التراب
صباح الخير يا شهداء بلدي
يا ورد بلدي
يا فخر بلدي
وشرف بلدي
صباح الخير يا لحمي وعرضي وبلدي
صباح الخير يا سينا
يا ارض الشهداء
يا مروية بدمنا من أول الزمن
لأخر الأيام
يا رب ما تنقطع لنا عادة
صباح الخير
يا كل عضمه في كل قبر ماحدش يعرفه
يا كل قطرة دم سالت على ترابك يا سينا وعطرته
صباح الخير يا أخواتي الحيين وعلى طريق النور ماشيين
أنتم الأحياء وأحنا الميتين
لكم المجد يا جنود الشمس
يا ابناء الصقر الأبي
يا راضعون من أثداء سخمت الأبية
صباح الخير يا واقفين على اسوار المجد
صباح الخير يا قنطره
صباح الخير يا سويس
صباح الخير يا سانت كاترين
صباح الخير يا عريش
صباح الخير يا كل حجر صار أخا لنا من كثرة ما شرب من دمائنا
صباح الخير يا بلدي
يا غاسله وجهك الجميل من نيلك
ومكحله عنيكي
ولابسه جديد في جديد
في يوم العيد
وفاتحه حضنك لكل الولاد ألي راحوا ولا رجعوا
ولادك يا بلدي
شهدائك يا بلدي
صباح الخير على ورد الوادي المعطر
المزهر
الواقف صفوف ما لهاش أخر
على ترابك يا بلدي
وحياة الدم الطاهر الى سال يا بلدي
وحياة الولاد الملفوفين بترابك
وراقدين في حضنك
لا تهوني ولا ترخصي
صباح الخير يا مصر
كل سنه وأنتي طيبه
وأنتي ولاده
كل سنه وولادك في حضنك
وراسك مرفوعه
صباح الخير يا شهداء وطني
كل سنه وأنتم تاج على روسنا


11 comments:

77Math. said...

وعقبال ما ييجي الصباح اللي تطلع فيه الشمس عالية وزاهية، وأولاد البلد كلهم في عز ونعيم، لا يلعنون أي شيء في أية مكان..يارب يكون اليوم دا قريب ونشوفه بأم أعيننا..

بس مين سخمت الأبية؟

"يا راضعون من أثداء سخمت الأبية"

:-|

Esmat said...

وعليك احلى صباح
يعنى انت اهوه عارف ان فيه يوم يحسب له
طيب اهو له حاجة حلوة
لقيت له صباح
لسه حتى الان بنقول عليه صباح خير
وانا معك اقول
لن ننسى رجال ضحوا بانفسهم
من اجل مصر وتحرير ارضها
لا توجد كلمات كافية لتصفهم
منهم من عاد ومنهم من لم يعد
والتحية لكل شهداء مصر
وهم ليسوا فى حاجة لنا لندعوا لهم بالرحمة فهم شهداء
واحنا اللى محتاجين اللى يدعى لنا بالرحمة

ابو احمد said...

كل سنه وانت طيب
الواحد نفسه قبل مايموت يشوف الشعب كله منتصر وسعيد تانى
تحياتى

Bella said...

كل سنة ومصر طيبة

كل سنة وكل 6 اكتوبر وانتم بخير جميعا

تصوروا ان هذه هي المناسبة الوحيدة الجميلة في حياتنا وحتى المناسبة الوحيدة سرقوها من اصحابها ونسبوها لغيرهم

http://afkaar-bella.blogspot.com/2007/10/blog-post_07.html

أبوفارس said...

صباح الفل والياسمين
..أعدت لذاكرتى أندفاعه اﻷدرنالين واﻷحساس بالفخر ..والرغبه فى الفعل
ياااااه
تحياتى..خالد

Alexandrian far away said...

العزيزة
77Math.
سخمت هي الإلهة المصرية القديمة، سخمت، عين رع
، المتوحشة في الحروب، ربة الجنود والجيوش والقتال والشجاعة، القوية التي لا تقهر، كما أنها ربة الإنتقام والعقاب ولها قدرات شفائية، وكانت ممفيس مركز عبادتها
وصورت على شكل أمرأة لها راس لبؤه

تحياتي

Alexandrian far away said...

الصديقة العزيزة عصمت
صحيح هم من يدعون لنا بالرحمه وليس العكس
كل سنه وأنتي طيبه
تحياتي

Alexandrian far away said...

العزيز إلى قلبي ابو احمد
صدقني وحيحصل

كل سنه وأنت طيب

Alexandrian far away said...

الصديقه العزيزه
بيللا
كل سنه وأنتي ومصر كلها طيبه
بس أنا ذنبي ايه أصطبح بوش شحاته الموحس ده؟
لكن معاكي هي أتسرقت من اصحابها فعلا
وأول السرقه بدأ مع عم شحاته المدوحس


تحياتي

Alexandrian far away said...

عزيزي الغالي أبوفارس
صبح الفل والياسمين والتمر حنه
دامت لذاكرتك أندفاعة الأندرنالين والأحساس بالفخر
لذلك سيبقون خالدين
لأننا لا نستطيع أن نعيش سوى بذلك الأحساس بالفخر الذي دفعوا حيواتهم ثمنا له

تحياتي وكل سنه وأنت طيب وفخور

Hannoda said...

صباح الخير يا قلب عايشة فيه بلده

يا قلب زي الأرض خيرها لكل اللي حوليها

زعلانة جدا اني ما جيتش هنا يوم ستة أكتوبر لإني كنت بدور على أكتوبر في المدونات وملقتهاش غير عند اسكندراني أحوي

كل سنة و انت طيب

وبحييك باحترامن شديد على البوست الرائع ده