Friday, February 15, 2008

عصافير يوم الجمعه

صباح الجمعه
العطله الأسبوعيه المجيده
وقهوة صباحية أرتشفها على مهل مسترخيا غير متعجل
طوال الأسبوع تتطاير الأفكار والأنطباعات في رأسي كعصافير نزقة لا أجد لا وقتا ولا طاقة لأصطيادها في شبكة الكلمات
الأن أرشف فنجان قهوتي وأنصب شبكة الكلمات لنرى أي طيور تقع فيها

Show Biz -1
يعتقد أغلب مؤرخي فن المسرح أن المسرح نشأ أول ما نشأ من الطقوس الدينية، لا يمكنني لا نفي ذلك ولا تأكيده، لكن يمكنني القول جازما أنني أعتقد أن فنون الأستعراض نشأت أول ما نشأت على يد رجال الدين، لا يمكنني الجزم إن كان رجال الدين قد أنشأوا الفنون الأستعراضية الأولى أم أن أوائل الفنانين الأستعراضيين هم من أخترع الدين بحثا عن ما هو أكثر ربحية، نعم الحق أقول أنني أعتقد بأن رجال الدين هم أول من أخترع الفنون الأستعراضية ، وأول من أبتكر المؤثرات الخاصة البصرية والسمعية، وأول من طور فنون التعامل مع المتلقي وترويضه والتلاعب بعقله ومشاعره، هم سادة فن المسرح والخدع البصرية، وهم ملوك فنون القول والخطابة
ليكن
الأمر دائما يتراوح ما بين المسرحية والخطابه
دخول التقنيات الإعلامية الحديثة أحدث طفرة في صناعتهم كرجال دين ومنحهم مجالات واسعة بما لا يتخيل
(أكثر من مئتي محطة تبشيرية تبث بالولايات المتحدة، وعدد لم أحصيه من المحطات الدينية الإسلامية تبث بالشرق الأوسط)
مما يؤكد رواج هذه الصناعة
صناعة الدين
كمهنة وكحرفة وفن
ليكن مرة أخرى
مسرح وعروض تلفزيونية ومستويات رفيعة من الفنون الأستعراضية تجمع ما بين التمثيل والخطابة والأخراج البصري
لكن أن يتحول الأمر لسيرك حقيقي
أن تتطور الأمور إلى مستوى السيرك والليل الليل يا ميمون (هي جملة كان يستعملها القرداتية بمصر لتلعيب نسانيسهم) فهذا هو الجديد المبهر
شاهدوا هذا الفيديو



حقيقة لا أجد تعليقا مناسبا سوى أنني أعتقدت أن المنابر تعني أكثر من ذلك
وأن لها أحترام وإجلال يفوق ما يفعل بها في هذا الفيديو
كما يظهر لكم العرض الترفيهي لا يجري في زاوية صغيرة أو مصلى مجهول ، بل كمما يبدو في مسجد جامع كبير بمنطقة ريفية
ربما عاصمة أحد المحافظات
أتسأل من سيستضيفون المرة القادمة على المنابر؟
هل سيكلفون هذا الأسد المصاب باللوز بألقاء خطبة الجمعه؟



لتنتقل اللعبة في مسارها الطبيعي من المسرح إلى السيرك وتلعيب الحيوانات

VALENTINE- 2

عيد الحب، مع أحترامي لكل من أرهق أبصارنا أمس بالألوان الحمراء اللامعة، ولكل من أنفق ثروة صغيرة لشراء كراكيب لا تسوى شيئا، ولا يمكن تسويقها عادة في أي يوم عادي طبيعي

لكنه حقيقة مناسبة مصطنعة لا أصل ولا فصل لها، وهي مناسبة تسويقية أساسا تهدف لتسويق وإنعاش سوق (الكلام الفاضي) والترويج للبضائع - الصينية غالبا- الرديئة المستوى وغير ذات القيمة
ماشي..ليكن
رزق الناس وربنا ما يجعلنا من قطاعين الأرزاق
وخللي الولاد يفرحوا ويظئططوا، ولعلها فرصة لكي يتذكر سكان الشرق الأوسط أن من النباتات ما لا يؤكل عادة وإن كان يمكن أكل وطبخ الورود



ما علينا
لكن بالطبع فإن هذه المناسبة العظيمة لا يجوز ولا يمكن أن تمر قبل أن تدلي المؤسسة الدينية - بأختلاف فروعها- بدلوها فيها
فتشمر عن أكمام عباءاتها وتعدل من وضع عمائمها وغتراتها وتتحفنا بهذه الفتوى الرهيبه

الحمد لله وحده والصلاة والسلام على من لانبي بعده … وبعد :
فقد اطلعت اللجنة الدائمة للبحوث العلمية والإفتاء على ما ورد إلى سماحة المفتي العام من المستفتي / عبد الله آل ربيعة ، والمحال إلى اللجنة من الأمانة العامة لهيئة كبار العلماء برقم (5324 ) وتاريخ 3/11/1420 هـ . وقد سأل المستفتي سؤالاً هذا نصه : ( يحتفل بعض الناس في اليوم الرابع عشر من شهر فبراير 14/2 من كل سنة ميلادية بيوم الحب (( فالنتين داي )) . (( day valentine )) . ويتهادون الورود الحمراء ويلبسون اللون الأحمر ويهنئون بعضهم وتقوم بعض محلات الحلويات بصنع حلويات باللون الأحمر ويرسم عليها قلوب وتعمل بعض المحلات إعلانات على بضائعها التي تخص هذا اليوم فما هو رأيكم :
أولاً : الاحتفال بهذا اليوم ؟
ثانياً : الشراء من المحلات في هذا اليوم ؟
ثالثاً : بيع أصحاب المحلات ( غير المحتفلة ) لمن يحتفل ببعض ما يهدى في هذا اليوم ؟
وجزاكم الله خيراً … ) .
وبعد دراسة اللجنة للاستفتاء أجابت بأنه دلت الأدلة الصريحة من الكتاب والسنة – وعلى ذلك أجمع سلف الأمة – أن الأعياد في الإسلام اثنان فقط هما : عيد الفطر وعيد الأضحى وما عداهما من الأعياد سواء كانت متعلقة بشخصٍ أو جماعة أو حَدَثٍ أو أي معنى من المعاني فهي أعياد مبتدعة لا يجوز لأهل الإسلام فعلها ولا إقرارها ولا إظهار الفرح بها ولا الإعانة عليها بشيء لأن ذلك من تعدي حدود الله ومن يتعدى حدود الله فقد ظلم نفسه ، وإذا انضاف إلى العيد المخترع كونه من أعياد الكفار فهذا إثم إلى إثم لأن في ذلك تشبهاً بهم ونوع موالاة لهم وقد نهى الله سبحانه المؤمنين عن التشبه بهم وعن موالاتهم في كتابه العزيز وثبت عن النبي صلى الله عليه وسلم أنه قال : (( من تشبه بقوم فهو منهم )) . وعيد الحب هو من جنس ما ذكر لأنه من الأعياد الوثنية النصرانية فلا يحل لمسلم يؤمن بالله واليوم الآخر أن يفعله أو أن يقره أو أن يهنئ بل الواجب تركه واجتنابه استجابة لله ورسوله وبعداً عن أسباب سخط الله وعقوبته ، كما يحرم على المسلم الإعانة على هذا العيد أو غيره من الأعياد المحرمة بأي شيء من أكلٍ أو شرب أو بيع أو شراء أو صناعة أو هدية أو مراسلة أو إعلان أو غير ذلك لأن ذلك كله من التعاون على الإثم والعدوان ومعصية الله والرسول والله جل وعلا يقول : (( وتعاونوا على البر والتقوى ولا تعاونوا على الإثم والعدوان واتقوا الله إن الله شديد العقاب )) .
ويجب على المسلم الاعتصام بالكتاب والسنة في جميع أحواله لاسيما في أوقات الفتن وكثرة الفساد ، وعليه أن يكون فطناً حذراً من الوقوع في ضلالات المغضوب عليهم والضالين والفاسقين الذين لا يرجون لله وقاراً ولا يرفعون بالإسلام رأساً ، وعلى المسلم أن يلجأ إلى الله تعالى بطلب هدايته والثبات عليها فإنه لا هادي إلا الله ولا مثبت إلا هو سبحانه وبالله التوفيق . وصلى الله على نبينا محمد وآله وصحبه وسلم ،،،،،،،،

اللجنة الدائمة للبحوث العلمية والإفتاء
الرئيس
عبد العزيز بن عبد الله بن محمد آل الشيخ
عضو
صالح بن فوزان الفوزان
عضو
عبد الله بن عبد الرحمن الغديان
عضو
بكر بن عبد الله أبو زيد



فتوى اللجنة الدائمة في عيد الحب
فتوى رقم ( 21203 ) وتاريخ 23/11/1420 هـ .

شفتوا العظمه؟
شفتوا الروعه؟
شفتوا كيف يهتم العلماء الربانيين بهداية الأمة ويحرصون عليها من موارد التهلكة حرص الأم الرءوم على وليدها، وحرص الراعي الصالح على معيزه وجديانه وتيوسه وليسمحوا لي أن أضيف لعلمهم المحيط الغزير قطيرة صغيرة، وأوصيهم بتحريم اللون الأحمر تحريما تاما وعقاب كل من يمسه أو يقترب منه وتحريم بيعه أوشرائه أو تصنيعه أو عرضه، فهذا اللون الملعون هو رمز من رموز النصرانية المشركة والعياذ بالله، وعلم من أعلامها ودلالة عليها وعلامة لها

أرايتهم؟
هاهو البابا رأس النصرانيه في رفقة جورج بوش الصليبي عدو المسلمين الأول وصديقهم الصدوق في نفس الوقت
حتى يتفق علماء الأمة على توصيف دقيق له
عموما الرجل سيغادر منصبه خلال أشهر قليلا ويريحهم من وجع الدماغ في تصنيفه وتوصيفه
وعليه فأنني أصدر فتوى بتحريم الصباغ الأحمر صناعة وبيعا وشراءا وأستيرادا وتصديرا وأحرم وضعه على الملابس أو الشفاه أو الرايات أو السيارات أو الملابس الداخليه
وقد أعذر من أنذر
أعزائي القراء
نبقى مع موضوع عيد الحب وفي معية رجال الدين الربانيين وموقفهم من هذا العيد الوثني الكافر ونرى جانب أخر من مقاومتهم لقوى الشر والفساد والأنحلال والكفر
حيث يحرقون الصور الخليعه




ويحرقون رموز هذا العيد الكافر المزندق الملعون

لكن...
أنتظروا
هؤلاء المؤمنين الغيورين على الدين والفضيلة والأخلاق
ليسوا مسلمين
إنهم
هندوس
والعياذ بالله

Hindu and Muslim anger at Valentine's
كفره ووثنيين وملحدين ألهم أحفظنا وأحفظ علينا أيماننا
هم أيضا يرفضون عيد الحب وهم أيضا يرفضون ذلك الأنحلال والأنفلات المسمى حب وعشق
سبحان الله
حتى الهندوس الكفره يتبعون شرع الله وفتاوي علمائه الربانيين
حتى لقد أجتمع كل من المسلمين والهندوس
على مقاومة هذا الفساد والفجور المسمى عيد الحب
وما فرقه الله
جمعه عيد الحب

3- الرسوم والزبده والمقاطعه...قطيعه تقطعهم


مرة أخرى نعود لموال الرسوم الدنماركيه السخيف، وبدلا من أن تصبح الدنمارك مرتبطة في الذهن بالزبده والأفلام الجريئة أصبحت ترتبط بالرسوم الكريكاتيريه والمظاهرات والأعتراضات والعنف والعناد وضيق العقل
لكن ألم يكن الموضوع قد طواه النسيان من زمن وأنطفئت ناره؟
فما الذي أعاد أشعاله؟
ببساطه لأن المسلمين عادوا لجر شكل الدنماركيين
وأستفزازهم

الدانمارك تعلن إحباط محاولة اغتيال رسام الصور المسيئة

مشكله فعلا، الناس رسمت
فقط رسمت
وضعت خطوطا على ورق ودفعته للمطبعه ليصبح حبر طباعة على ورق
والرد كان الدم
الرد كان القتل
الرسامون لم يحملوا قنبلة ولا سكينا ولا مدفعا
لم يحاولوا قتل أحد أو ذبح شخص ما
فقط رسموا
وبغض النظرعن مدى لياقة أو أخلاقية ما فعلوه
فهو فعل مسالم يدور في فلك التصريح بالرأي والتعبير عنه
حتى لو كان رأيا رديئا
وكان طبعا من الممكن جدا الرد عليه بالرأي السلمي
لكن هيهات
ذلك ما قد يحدث في كون أخر ووجود مختلف
لابد من القتل
ولا يسلم الشرف الرفيع من الأذى حتى يسال على جوانبه الدم
لكن حقيقة لماذا؟
لماذا نشر الدنماركيون هذه الرسوم أولا؟
ولماذا يسيئون إلى نبي المسلمين؟
نحاول نشرح
وإن كان أي شرح سيكون صعبا وتقريبا غير ذي فائدة في ضوء حالة جنون الأضطهاد التي تتوج الخطاب الديني الإسلامي
مبدئيا الثقافة الغربية لا تضطهد نبي المسلمين بشكل شخصي وخاص
الثقافة الغربية ومنذ بدايات عصر النهضة الأوروبي تشن حربا لا هوادة فيها ضد المقدس السماوي
طلبا للقضاء عليه وإعلان مقدسات أخرى تستمد قداستها من الأرض لا من السماء
مقدسات بدأت بالدولة القومية مرورا بحقوق الأنسان وصولا للديموقراطية والبرلمانات وحقوق التعبير والإبداع
وبالطبع فأول مقدس تعرض لذلك الهجوم هو المقدس المسيحي ووصل ذلك الهجوم ذروته برفض أوروبا تضمين أي أشارة عن المسيحية في دستور أتحادها، الإسلام يطرح نفسه كقضية جديدة على الغرب، فمنذ الغزوات العثمانية التي أنتهت بفشل حصار فيينا 1529 ميلاديا لم يكن الإسلام مطروحا بهذا الإلحاح والقوة على الحضارة الغربية، هذه المرة الإسلام ليس جيوشا جرارة تقف خارج الأسوار المحصنة، بل الإسلام يقيم وسطهم مواطنين ومهاجرين ولاجئين، إنه يسكن البيت المجاور ويجلس على المكتب في نفس الغرفة، ويرفع مآذنه وينصب قبابه، وتسير نسائه محجبات بالشوارع ويحك رجاله لحاهم المهوشة وهم يذرعون الميادين الأوروبية، المقدس يعود مرة أخرى، المقدس السماوي يعود بصيغة جديدة وطبعة مختلفة يعود بأوامر ونواهي تسقط من السماء، بشروط وقوانين لم يصوت عليها أحد في البرلمان
يعود بحجابه ولحاه وجرائم الشرف وأكداس مكدسة من القداسة والحلام والحلال
عاد المقدس السماوي
فلم لا تعود الحرب عليه؟
مقدس جديد طازج وبكر
يفتح مجالات لا نهاية لها للهجوم عليه والسعي لهزمه وتدجينه وأستئناسه
فكان الكاريكاتير
هل تبدو الفقرة السابقة جافة ؟
أدعوكم للتخفف منها والأستعداد للفقرة التالية مع هذه الرسوم الكرتونيه





4 -إلا رسولهم ...وقاطعوا تصحوا

حملتان أنطلقتا بناءا على موضوع الرسوم الكاريكاتوريه، الحملة الأولى تاريخيا هي حملة المقاطعه، وهي البنت الشرعية لحملة سابقة عليها دعت لمقاطعة البضائع الاسرائيليه والأمريكيه ، وهي في الحقيقة كانت من أطرف الحملات التي أعلنت في التاريخ
وأصدقكم القول أنني كنت أحصل على أبتسامة مجانية كل صباح حين أتلقى بريد الحملة الإلكتروني الذي كان يصلني بغير طلب مني ولا مشيئه ، الطرافة في تلك الحملة أنها تركزت حول مقاطهة بضائع من نوع: كوكاكولا وبيبسي وماكدونالدز وبيتزا هت وأريال ومنتجات جونسون وما إليه، الجميل والمدهش هو أن شخصا يركب سيارة جيب شيروكي، ويحلم بأقتناء سيارة هامر، يذهب لمكتبه ليشغل مكيف وايت وستنجهاوس ويدير كمبيوتر ماركة دل مزود ببروسيسور صناعة إنتل، ومزود بنظام تشغيل ويندوز ومضاد فيروسات نورتون، ويستعمل ماوس وكي بورد من مايكروسوفت ليفتح موقع هوتمايل ويرسل منه بريد إلكتروني يدعو لمقاطعة البضائع الأمريكيه : كوكاكولا وماكدونالدز وبيبسي
طبعا نقاطع كوكاكولا وماكدونالدز
أما البرامج والكومبيوترات والأجهزة الكهربائية وسيارات جنرال موتورز فلا وألف لا وإلا..........
فكيف نعيش بلا كابريس وكيف نقاطع دون تكييف؟

الحملة الثانية والتي تميزت بالجدة والروشنه هي حملة
إلا رسولي
والحقيقه الجمله نفسها شكلها كده عمرو خالد


شكلها روش ومتحضر وشيك
إلا رسولي
إعملوا أي حاجه في الدنيا إلا رسولي

جزروا الفلسطينيين ودمروا حياتهم وبيوتهم ..مش مهم...إلا رسولي
ذبحوا العراقيين وفجروهم وأختلوا أرضهم وقسموها وأنتهكهوا أعراضهم...لكن إلا رسولي
تسرق وتنهب ثروات الوطن ويقضى على أستقلاله وحريته...لكن...إلا رسولي
تتراكم ثروات خرافية من مص دم العمال الأجانب وتجارة الرقيق الأبيض والسلاح ..لكن..إلا رسولي
ينقسم الإسلام إلى ديانتين مختلفتين ديانة سنية وأخرى شيعيه...لكن إلا رسولي
أفعلوا بنا ما تشاءون...لكن إلا رسولي

لو سمحتم لي
عن أي رسول تتحدثون؟


30 comments:

Anonymous said...
This comment has been removed by a blog administrator.
Alexandrian far away said...

أعزائي القراء والمعلقين
سامحوني على تفعيل الموديريشن
لكني فعلا سئمت الكائنات التي تدخل المدونه لتنبح وتترك قاذوراتها المكتوبه على المدونه، وأنا لست مضطرا لتكريم سفالاتهم بنشرها، ولست مسئولا عن فشل أهاليهم في تربيتهم ولا أنوي طبعا أن أخذ موقع تعليمهم الأدب والتربيه
فسامحوني على وجود الموديريشن وأعدكم أن لا رأي مهما أختلف معي سيتم حجبه
أما من يهوون النباح فلينبحوا بعيدا عني

ابو احمد said...

نفسك طويل اوى يااسكندرانى
ربنا يقويك
تحياتى

عباس العبد said...

ايه يا برنس صباح الفل
بعض الاسئلة
هو الاسد المفروض انه بيقول الله اكبر و لا الى بيعلقوا على التصوير اول مرة يشوفوا اسد ؟
====
هو الولد الصغير ده بجد و لا متفبركة و لا انت بتهرج ؟
و بعدين ده بيهاجم عمرو خالد جامد جدا !
========
دادادادادادادا
نادامماناداناماامددااد
ده راى بصراحة
الفيديو الاخير ده ممكن تترجم بسببه
و عندى الى يخلص فى الموضوع ده
حبيبك هو
حقول بيتهكم على الذات الالهية
و اعيط و ارفص و ادبدب برجلى على الارض
و حيبقى نهارك احمر
احمر قوى
ههههههههههههه

Anonymous said...

العزيز اسكندراني

خير مافعلت صديقي فعلا فيه ناس غريبه بتفتكر ان بقله الأدب ممكن يوصلوا فكرتهم و رأيهم مع ان لو اتبعوا اسلوب متحضر حيخالوا حجتهم قويه بس نقول ايه

ماتزعلش نفسك ياجميل

الصراحه لست من هواه سماع او مشاهده عمرو خالد عشان صوته
ماتقولش عليا هايفه او سطحيه بس الصوت عليه عامل كبير عشان يجذبك انك تسمع انسان في التليفزيون مثلا
عارف كمان ايه اللي بيحصل؟قريت ان موضوع خطبه الجمعه كان عن فوز المنتخب بالكاس
يعني بيحرموا عيد الحب و بيخالوا موضوع خطبه الجمعه عن المنتخب

حاجه حلوه بجد

سيبك انت كل سنه و انت طيب و كل يوم و انت في حاله حب عزيزي

Layla said...

ياااه...بوست هايل جمعت فيه اكتر الحاجات المستفزة المنتشرة اليومين دول في الايميلات والمنتديات

فعلا طمنتني ان لسة في ناس عندها شوية عقل وبتفكر صح

تحياتي لك

:)

MerMaid said...

العزيز اسكندراني
------------------
الحمد لله انك كويس بعد ما كتبت البوست الطويـــل ده
:)
هو فعلا البلد يتم كساؤها باللون الاحمر اثناء عيد الحب
المشكلة ان الحب في حد ذاته شيء جميل جدا و شيء مقدس بالفعل ولكن لا يكفيه يوم واحد فقط للتعبير عنه و لاهداء الهدايا
كمان لا يحتفل بعيد الحب الا شباب الكورنيش فقط
و في الغالب بيكون مفيش بينهم حب
لكن الهدايا نفسها مش مجرد كراكيب
يعني لما صديق ليك او صديقة يجيبلك هدية في عيد الحب ده انا اعتبره تقدير و احترام و مشاعر صادقة
-----------------------
انت قلت انهم ليسوا مسلمين
واللينك بيقول انهم مسلمين و هندوس

ماعلينا
المهم انهم تافهين قوي يعني و فاضيين و دماغهم مفيهاش الهوا انهم يطلعوا يعملوا كل ده علشان عيد الحب
مشفناش ده يعني في الحرب ع العراق او في حصار غزة
ولا دول مش مسلمين برضه؟

ع العموم انا لية اراء مختلفة عن باقي الناس في حكاية المقاطعة
انا ضد المقاطعة عامة
سواء كانت الامريكية ولا الدنماركية
و ده للاسباب اللي انت ذكرتها و هي ان المقاطعة بتتم لحاجات دون الاخري و ده طبعا يخليها غير مكتملة المصداقية
لاننا لو قاطعنا المنتجات بتاعتهم كلها كلها
يبقي هنرجع تاني للعصر الحجري او ماقبل التكنولوجيا

عامة
صباح الخير
:))

تحياتي ليك

Fantasia said...

لأاااااااا.. دا انت عايز قاعدة طويلة بقى.. انا عندي كلام كتير أوي عن كل فقرة في مقالك ده
للأسف مفيش وقت أكتب تعليقي المرادي, بس قولت لازم احييك لغاية ما أرجع تاني واكتب تعليقي

مقال هايل واراء ممتازة وتحليل يصيب الهدف

تحياتي يا عزيزي

Hypatia said...

بالتأكيد اى تعليق بعد كلامك حيكون ساذج ومالوش معنى بس عشمي فيك دايما انك بتتحمل سذاجه تعليقاتى بصدر رحب
:)
______________________
اعتقد ان الفنانيين الاستعراضيين استخدمو الدين وارتدو عباءته واستغلوه على مر السنين وحاليا باشوف بعيني كل يوم العينه ديه بدايه بعروض عمرو خالد نهايه بصابرين وحسن يوسف وسهير رمزى وحنان ترك وبسمه وهبه و غيرهم
كلها استعراضات تموت من الضحك فى احيان كتير ده حتى احمد السقا بيتكلم فى الدين
حضرت من خمس سنين وانا فى ثانوي عام عرض لعمرو خالد فى نادي سبورتنج خرجت منه لارتدي الحجاب فى اليوم التالى
انا ندمانه على شئ واحد فقط انى ارتديت الحجاب تحت التنويم المغناطيسي والله تنويم مغناطيسي لانى فعلا مش فاكره اى شئ من العرض دلوقتى لذلك اعتقد ان حضرتك مش لازم تستهين بعضلاتهم الاستعراضيه ومواهبهم الخطابيه بعيدا عن السيرك اللى حضرتك عرضته للطفل والاسد ملك الغابه لكن فيه مؤسسه استعراضيه كبيره وناجحه فى تحقيق اهدافها مينفعش نقول عليها سيرك لان تاثيرها اكبر من كده


الموضوع ده بيتطرح فى كل عيد حب وعيد ام وعيد شم النسيم ونفس الكلام ونفس الفتاوى لكن الجديد موضوع الهندوس ده حاجه تفطس من الضحك برضه
قبل اعياد السنه الجديده عمرو اديب غتت علينا بحلقه للشيخ خالد الجندي
ولد صغير اتصل بالشيخ يسأله هو عيب وحرام انى اخد هديه من سانتا كلوز بابا نويل
رد الشيخ بان عيب وحرام ولازم الاطفال المسلمين اولياء امورهم يقولولهم ان الهديه ديه من "بابا محمد"والله العظيم قال كده بابا محمد
قال ان حاجه زى كده حتزرع فى الاطفال حب"بابا محمد"بدل حب بابا نويل
محدش قال للبغل ده ان الاطفال اعتقد فى العالم كله سواء مسلمين مسيحين يهود بالنسبه ليهم بابا نويل مش رمز ديني ومش بيتم الاشاره ليه باى شكل على انه رمز ديني هو مجرد نوع من الخيال والفانتازيا لكن محمد "ص"رمز ديني عند الاطفال المسلمين من السذاجه انه يحوله لمجرد"بابا محمد"جالب للهدايا فى راس السنه الهجريه
حاجه تفقع


تخيل كده اتعمل حاجه زى شفره دافينشي للبحث فى حقيقه الاسراء والمعراج مثلا من وجهه نظر ادبيه او من خيال اديب او روائي يالهوى ده الدنيا تولع وفعلا حصل اختلاف من المسيحيين المتدينيين حول شفره دافينشي لكن الموضوع ماخدش الشكل الدموى الهمجى اللى بياخده عندنا وسذاجه المقاطعه والحملات اياها
فيه قصه كلنا نعرفها من الطفوله واظن انها موجوده فى كل الاديان وهى قصه ابراهيم عليه السلام لما حطم الاصنام ليثبت لقومه ولابيه انها ليست الهه لانها لا تستطيع حمايه نفسها قصه بسيطه والمفترض اننا مؤمنين بيها والمفترض انها بتقول ان الاله قادر على حمايه نفسه بالتاكيد يبقي ليه بننصب نفسنا حماة الحمى مع انه من المفترض انه "الله عز وجل"و رسل الديانات السماويه اقوياء فى قلوب المؤمنين بيها اقوياء بحكم التاريخ كمان مش بالهشاشه اللى تخليهم يتحطمو او يحتاجو حمايتنا او وقوفنا فى وجه بعض الشخبطه او الرسوم او الرأى اللى بيتحمله صاحبه فقط
سذاجه وهمجيه
يسوع من زماااااااان فيه كاريكاتور وافلام كتير بتصوره بسخريه بل وفى مشاهد جنسيه بورنو صريح بيستخدمو المسيح وعمرنا ما سمعنا عن هبه شعبيه لانقاذ المسيحيه من اعدائها
احنا نظريه المؤامره مسيطره علينا بشكل مش طبيعي للاسف

بالتاكيد الضغط اللى بيتعرض ليه المنقبات والملتحين فى اوروبا وغيرها مبرر خاصه بعد احداث سبتمبر وبكل بساطه لو حاولنا ننتقل بتفكيرنا للجانب الاخر حنلاقي خوفهم واحطياتهم وضغطهم على المسلمين مبرر جدا لكن احنا عندنا حمير مش بتفكر ولا بتفهم وسلمللى على حمله الافراج عن سامينا مالك

Hannoda said...

قريت للآخر و اتناقشت معاك في أجزاء كتيرة

بس الل طلعت منه في الآخر اننا بنعاني من مشكلة السطحية و التعامل مع مشكلاتنا من على السطح فقط و بأكثر الاساليب جاذبية مش فاعلية

حاجة تانية
إحنا تايهين وعندنا خلط كبير بين الحزم والوضوح تجاه معتقداتنا الدينية و بين مفهوم تقبل الآخر و السلام

ما يحدث حولنا سواء في الدين أو السياسة فهو وضع طبيعي ولابد أن نتكيف معه

الاعلام و تمدد و توغله داخل البيوت
العولنة و اتصال كل أطراف العالم بمنتهى السهولة
كل ده سبب في زياده انتاج.. بل تضخم في كل شيء
الآراء الدينية و الاجتماعية و السياسية

مبقتش عارفة ده في مصلحتنا ولا ايه
مواضيعك كتير جدا و أنا بتوه في أفكاري بسرعة

لكن اللي عاوزة أقولهولك إن الدين علاقة بين الانسان و الله.. وعلينا واجبات من ضمنها إننا لما نشوف الغلط نكون ايجابيين
و اليجابية ثقافة ما اتعلمنهاش عشان كده بنتخبط

سامحني على عجزي عن التحاور

و تحياتي ليك

Alexandrian far away said...

صديقي العزيز
أبو أحمد
المدونه نورت بتشريفك
بجد أفتقدتك وأفتقد كلماتك وتعليقاتك
بس لا مؤاخذه نفسي طويل في أيه؟
في الكتابه كحجم ولا الكتابه كموضوع؟

تحياتي ومودتي

ابو احمد said...

انا قصدى طبعا المدونه دسمه
لسه الواحد بيفكر يرد او يعلق على موضوع الشوفينيه
لقيت البوست ده وهو متشعب ومثير كل سطر فيه حدوته
بالنسبه لموضوع الشوفينيه انا مش شايف ده فى المصريين باختصار المساله مرتبطه بالمراحل التى يمر بها اى شعب من الشعوب واعتقد ان مصر احتضنت ثوار وكتاب وشعراء غير مصريين ومطربين ومازالت
بالزمه ده شعب ممكن تقول عليه شوفينى
تحياتى
مجدى

ابو احمد said...

طبعا انت عارف قد ايه انا بقدر كتاباتك وعشان كده افتكرتها شئ بديهى مش محتاج تكرارتحياتى
مجدى

Alexandrian far away said...

قداسة رامز باشا
تحت أمرك في الإجابات
المفروض يا سيدي أن الأسد بيقول الله
وبرضه مش بعيد أنه المشاهدين عمرهم ما شافوا أسد قبل كده، خصوصا لما يكون عنده اللوز ، وأنا أسمع أشاعات إنه هذا الأسد بالتحديد هو حفيد الأسد ألي رفض ياكل النبي دانيال، وتقول بعض الجماعات أنه سيخرج من صلبه الأسد الذي سيرقد الحمل في حضنه عند حلول السلام على الأرض
============

الولد الصغير بجد وحقيقي وله تسجيلات على اليوتوب نقلا عن قناة الناس
يعني حأكون أنا الي مؤلفه يا رامز
وبعدين ده راي الأخوان والسلفيه في عمرو خالد

==================

يا أستاذ رامز الفيديو الأخير هو مقتطفات من مسلسل كرتوني شهير جدا تنتجه قناة فوكس الأمريكيه وتذيعه على قنواتها وليس من أختراعي، يا ريت تتهمها بذلك وتطالب بتنفيذ الحد في قناة فوكس

تحياتي
فين التعليق بقى؟

Fantasia said...

عزيزي اسكندراني

وعادت فانتازيا بعد الفاصل

اولا لازم اشكرك على التدوينة دي لانها جمعت افكار كتير كانت متناثرة في دماغي, وقالت كلام كتير كان جوايا وماجاتش فرصة اني اقوله. فدلوقتي انا استسمحك في زضع لينك للتدوينة دي عندي, عشان توفر عليا اعادة كتابة ما تفضلت به هنا يا سيدي

ثانيا, انا عرفت انت سميت التدوينة عصافير يوم الجمعة ليه.. اكيد عشان أي حد يمشي ورا الكلام اللي بيحصل ده لازم يكون داقق عصافير

فن المسرح نشأته دينية فعلا. مش بس كدة, دا كانت الاحتفالات الدينية اللي بيتقدم فيها عرض مسرحي فيه مشهد قتل او تعذيب مثلا, بيجيبوا فيها حد من اللي محكوم عليهم بالاعدام ويقتلوه فعلا ع المسرح قدام الجمهور. والجمهور يسقف ويصفر ويطنطط ويروح مبسوط 24 قيراط

دا فعلا شغل الليل يا ميمون. لكن دا حتى ميمون عارف انه ميمون, بس الولد الصغير ده يا عيني مش عارف انه بيقدم فقرة ف السيرك. يا حرام عمال يجيب من جواه عشان يتقن الدور. اكيد دا شايل اللوز من زمان. وعمال يكر الاسطوانة اللي حافظها ولا هو فاهم هو بيقول ايه! يعني الواد دا فاهم يعني ايه ختان؟ حد يفهمني يا ناس قبل ما نفوخي يتفرتك! الواد دا عارف يعني ايه ختان؟ عارف ايه اللي بيحصل فيه وليه؟ وعمال يدافع عنه ومحموء أوي كأن حد خطف الساندوتش بتاعه.. يخرب بيت ابو كدة بجد

المهم وانا بتفرج وعندي حالة ذهول مصحوب بالبسقيف والضحك الهستيري, قعدت اقول ف سري الواد دا لو نسي كلمة اكيد الشريط هيسف. وسبحان الله يعني اول ما الكليب خلص ببص لقيت فيلم "موقف طريف" حصل للشيخ الطفل وهو في التليفزيون. الشيخ الطفل؟!! طب تيجي ازاي دي؟ ما علينا, قولت يا بت مشيها خلينا نشوف فيه ايه اطرف من كدة. وكأني كنت بفتح المندل, لقيت الواد في عز حمقته نسي كلمة والشريط سف, وقعد يا عيني يضحك عشان مش فاكر ولا كلمة ولا عارف يروح فين ولا ييجي منين

بس دا مش موقف طريف. هو طريف لو دي فقرة كوميدية. مش على قناة متطرفة ارهابية بتستخدم الاطفال في شغل الجلا جلا. لكن رجعت وقولت اما انتي يا فانتا عليكي حاجات.. ماسكة ف الحنة بتاعة طريف ومش طريف.. ما قالولك الشيخ الطفل, فيه ايه بعد كدة؟
عمالة تقولي فين التعابين؟.. طب هو فين الظابط؟

المهم دخلتلك عى موضوع الفالانتين وكنت قريت عنه قبل كدة عند الغالي حسن الهلالي. وافتكرت ام الفوروادز اللي كانت بتجيلي على الايميل قرب الفالانتين. نظام احذر الفلانتين.. اياك والفلانتين.. الفالانتين رجس من عمل الشيطان.. الدواء فيه سم قاتل.. قصدي الفالانتين فيه شر عظيم, وبتاع
هو عيد الحب دا بيفرقع؟ دا هو العيد الوحيد اللي مافيهوش بمب, فيه ورد ودباديب بس. قارفهم ف ايه ان الناس تحب بعض نفسي افهم! ماللي عايز يكع دم قلبه ويجيب ورد بضعف التمن ودباديب صيني ب200 جنية هو حر. وكل سحلول ياخد سحلولته يفسحها فسحة حلوة كدة ويبطلبوا خناق ونكد يوم واحد ف السنة. ايه المشكلة؟ اشمعنى يعني ام الفالانتين اللي مجننهم؟ ما يخلوا الناس تفرح جتهم الغم

تعالى بقى على الموضوع بتاع الدانمارك
الراجل الرسام اللي حاولوا يقتلوه دا طبعا مش هيكمل ف الدنيا كتير. المكان الوحيد اللي ممكن يستخبى فيه هو سجن جوانتامو ويحطوه ف مبنى لوحده كمان, عنبر الكاريكاتير

اللي انا مش فاهماه هو ليه احنا مش شايفين اننا بقينا عاملين زي التور اللي كل ما يمسكوله الرسومات يروح يجري عشان ينطح اللي ف وشه؟ شكلنا بقى وحش يا جدعان. ماللي يرسم يرسم. يعني واحد طلعلي لسانه وقولتله عيب يا عم وما اتلمش, اروح اجري وراه بقى واعمل حملة وشعارات ومظاهرات؟ طب ما هو هيطلعلي لسانه تاني طبعا عشان يغيظني اكتر. هو يعني الشوية دول هيعملوله ايه؟ ما اقاطع ولا ازعق ولا اخبط راسي ف الحيط. هو دا اللي هو عايزه. كل ما انا بتغاظ بغلط وببان قدام العالم اني همجية وتافهة. واخرتها كمان ارهابية

طب ما رسامين الكاريكاتير في العالم كله بيرسموا ربنا ويتريقوا عليه.. الله ذات نفسه, لا هأقول موسى ولا عيسى ولا محمد.. لأ ربنا نفسه بيرسموه لابس جلابية بيضا وعنده دقن بيضا وصلة لغايه رجله وبيقول كلام اخر مسخرة. دا حتى كان فيه كاريكاتير بيتريق على انتشار السمنة والبدانة في العالم, راسمين فيه ربنا تخين قوي وواقف فوق ميزان والتعليق ان ربنا خلق الانسان على هيئته, يعني عشان هو تخين خلق الاكل بيتخن

طب مافيش حد اتكلم عن الراجل دا ليه؟ طب مافيش حد بيتكلم عن النكت اللي بتتقال عن ربنا ليه؟ ولا عشان ربنا دا بتاع الكل؟ يعني لو ربنا دا كان بتاع المسلمين بس كنا اتحمقنا أوي.. دا اسمه شعور بالدونية ومافيش حد بيمشي ورا التفاهات الا التافه واللي متأكد انه تافه

على رأيك الحملة دي لازم شعارها يكمل.. ادبحوني, احتلوني, افرضوا عليا حصار اقتصادي, خلوني اجوع واتشرد انا وعيالي, لكن إلا رسولي. اوعى رسولي لحسن انا شرز, اجي ف الهايفة واتصدر. هأقتلك لو اتكلمت عن رسولي. لكن تحتلني اهلا وسهلا.. هاسيبك وامسك في جاري الشيعي اقطعه عشان رسولي برضه

هو حد كان منعنا برسم اللي نرسمه؟ ما نرسم الرسام ده وراسه راس حمار مثلا! ما نرسم الجبنة الدنماركي وعليها صورة حمار بدل البقرة.. لكن نقتل؟؟ هو القتل سهل أوي كدة؟ أي حد مضايقني اقتله واخلص؟ مش مهم كام واحد يموت ملهمشي ذنب, المهم اخلص من اللي طلعلي لسانه وخلاص

المشكلة انهم مش عارفين ان اللي بيعملوه دا هيزود الرسومات مش هيقللها أو يمنعها. وهما طبعا لما الموضوع يزيد هيقولوا "الكفرة, اعداء الاسلام, عليهم اللعنة.. ازاي يقولوا اننا ارهابيين؟.. يلا نحاربهم.. الى الجهاااااااااد

وسلام كبير للتنمية والتقدم العلمي

خالص تحياتي

Azza Moghazy said...

حلو كدة لما انشر البوست اياه مش هترجم لوحدى

ازيك يا فندم

لدى اعتراف
اعرف انه سيجر على السخرية لكن مش قادرة انكر اكتر من كدة
لم اكن اعرف ان هناك شئ يدعى الفالانتين حتى عامى الجامعى الاول
كنت ساذجة حمقاء فى السادسة عشرة
دخلت الجامعة لاجد كل ما حولى احمر وهناك الكثير من الهدايا المتبادلة حولى
فتصورت ان اغلب الزملاء فى الجامعة ولدوا يوم 4 نوفمبر
وعندما تكرر الامر يوم 14 فبراير وجدت الظاهرة مقلقة خاصة ان من احتفلوا باعياد ميلادهم فى 4 نوفمبر يعيدون الاحتفال به
فلما سالت
عرفت بوجود عيد الحب
فى العام التالى خادعتنى نفسى الامارة بالسوء يوم 14 فبراير عندما نسيت وهيأت لى ان هناك حملة جماعية للتضامن مع المحكوم عليهم بالاعدام لكنى صفعتها - اى نفسى - كى تستفيق مذكرة اياها بانه الفالانطين لا مؤاخذة

Alexandrian far away said...

الصديقه العزيزة
أجنده حمرا
تحياتي
أتفق معك، صوت عمرو خالد ينرفز فعلا، وطريقته المخنثة في الكلام تصيب بالقشعريره الصراحه

المهم كما قلتي
كل سنه وأنتي في حالة حب

Alexandrian far away said...

عزيزي مارفل
أشكرك على مجاملتك وأتمنى أن أكون عند حسن ظنك دائما

تحياتي ومودتي

Alexandrian far away said...

الصديقة العزيزة ميرميد
الصور للهندوس والخبر كان يتحدث عن مظاهرات منفصلة لكل من المسلمين والهندوس ضد عيد الحب، وعموما الهندوس عندهم حركات أسوأ حتى من الأخوانجيه والسلفيه وتنظيم القاعده

معك في موضوع المقاطعه
تحياتي ومودتي

Empress appy said...

يا نهار بجد انت تغيب تغيب وتقوم خبطنى بوست يطلع من عينى على دماغى بجد تصدق انت فعلا نبهتنى لحاجات كتير فى موضوع المقاطعه دى يااااااااا غابت ازاى عننا
بص ليه حاجه بسيطه جدا فى موضوع الا رسولى
انا شايفه ان الناس دى مش فاهمه كتير عن الاسلام اللى هما الدنمارك او البلاد التانيه غير العربيه فواجب اننا نفهمهم وده الصح وبصراحه من تجربه شخصيه ليه مع واحده هولنديه صديقتى ولما فهمت حاجات كتير عن الاسلام صح احترمت الاسلام فعلا بص هى المشكله فى الناس اللى بتتصرف بدون وعى وبتسيئ للاسلام وللاسف منهم مسلمين وبيبينوا للعالم اننا همجين
بس صباح فنجان قهوة فى يوم اجازة جامدة بوست حلو فعلا دماغ موتتتتتتتتت

Desert cat said...

انا مش من هواة عيد الحب وماليش فيه خالص اللهم ديمها نعمة واحفظ جيوبنا عمرانة
بالنسبة لعمرو خالد برضه انا ماليش فيه
ده انا مرة اتوقفت عضويتى فى منتدى بسببه منهم لله وقالوا عليا كافرة علشان أتجرأت وقولت بس انى مش بحب اسمع له
امال لو قولت مش بحبه هو شخصيا كانوا عملوا ايه
اقاموا عليا الحد بعد ايقاف العضوية
بالنسبة بقى فى موضوع الا رسولى
طبعا كدا اثبتنا لهم ان فعلا فعلا المسلمين دول عالم همج ومش بيتفاهموا الا بالدم
يبقى كل واحد لا يلومن الا نفسه
تحياتى

alexandrany said...

سيدي
لست أدري بمن تقصد ب الذين يهوون النباح
بس عموما دي اول مرة ادخل فيها لمدونتك
سيدي ..للامانه انا ما كملتش البوست للاخر
انا قريت بس اول فقرة الخاصة برجال الدين
اسمحلي اقولك ان انت عرضت فكرتك بلا ادني استثناء حتى وان كان هناك من يهوى العروض فمن الظلم ان تتهمهم كلهم بهذه التهمه
انت بمنتهى البساطه سويت بينهم وبين بعض الاراجوزات
عموما
كلمة بسيطه احب بس اوضحها
ليس هناك في الاسلام لفظ "رجال الدين"ده مصطلح غربي يعرف به رجل الكنيسه وحضرتك ممكن تتاكد ولا يوجد في الاسلام.
سيدي لست من هواه المجادله ووجع الدماغ بس حسيت من اول البوست بتاعك انك بتجور على حق ناس كتير
ناس ليهم فضل علينا مش شرط يكون ليهم فضل عليك بس ليهم فضل على ناس على الاقل من اللي اعرفهم
ناس حبيت بس ارد غيبتها
مش عارف اذا كنت هتعتبرني م الذين ينبحوا وواذا فعلت فسامحك الله
معلومه بس اخيرة انا لست بإخواني ولا بسلفي ولا وهابي ولكني ابجل هؤلاء العلماء واضعهم في مرتبه عاليه بالنسبة لي
عموما
الله يهون غربتك وتعود بالسلامة ان شاء الله

Alexandrian far away said...

الصديقة العزيزة نسرين
أولا انا لا أسمح
ولا اسمح نهائيا كمان
أنك تتهمي كلامك بالسذاجه:-)
مين قال كده؟
بالعكس تعليقك فعلا اثرى الموضوع ووسعه
وأعطاني بذور لتدوينه قادمه
خصوصا موضوع الهدايه على يد فلان أو علان دي
أما موضوع بابا محمد ده فهلكني من الضحك وبجد صعب عليا أمسك نفسي من كتر الضحك
يخرب بيت التخلف هو ما حدش قال لهم أن من أخترع سانتا كلوز هو شركة كوكاكولا كحمله إعلانيه؟

أشكرك على أهتمامك وتعليقك
سلامي ومودتي

Alexandrian far away said...

الصديقة العزيزة والأخت هند بلدياتي
هند أتناقشتي معايا فين؟
لكن صدقيني دائما ما كانت تعليقاتك مضيئة لنقاط للتفكير

تحياتي ومودتي

Alexandrian far away said...

العزيزه والعقل الرائع عزه مغازي
أي تدوينه تقصدين؟
عموما أنا منتظر ولا شك عندي في أنها ستكون تدوينة رائعه

على فكره عيد الحب عندي مناسبه منحوسه ودائما ما كانت علاقاتي تنتهي فيه أو بعده بقليل
ما يبطلوه أحسن
":-)
تحياتي ومودتي

Alexandrian far away said...

العزيزة أبي
شكرا على مديحك
وصدقيني الغياب بسبب الأنشغال في العمل غالبا وعلى عيني الغياب عن أصدقائي الأعزاء على المدونات

تحياتي

Alexandrian far away said...

العزيزه قطة الصحراء
طبعا لهم حق يكفروكي
عمرو خالد شخصيه مقدسه فعلا
مش بيكسب أتنين ونص مليون دولار في السنه
كتنا نيله في القرايه والثقافه والصحافه ووجع القلب
أنا بكره حأركب دقن وأطلع أقول بقين في التلفزيون يمكن الواحد يعرف يسدد ديونه
:-)

Alexandrian far away said...

عزيزي الأسكندراني
عجيب سوء ظنك بي
أنا أقصد بالنباح نموذجا للأسف سأضطر لنشره حتى أرفع الألتباس

بص يا سيدي على التعليق ده الذي لم انشره

والله لسة اهبل وشلتك شوية هبل كتكوا الارف
بطل بقى الهبل دة
بطله يا اهبل يا واطي
ربنا هيهلكك لو ما ارتجعتش عن اللي انت فيه
قولي بقى نصراني مبشر زي فانتازيا كدة
اوعى تكون ناسيني

أنتهى
تفتكر ده مش نباح وقلة أدب وسفاله كمان؟
تفتكر مفروض أنشر كلام كلب زي ده؟
هو لو قال الكلام ده في وجهي حأضربه علقه أحتمال ياخد فيها الشهاده

مرحبا بك وبتعليقاتك في أيي وقت يا عزيزي
أما عن الفقهاء وفضلهم فمكانه تدوينة جديدة أتمنى أن تثري النقاش بيننا

تحياتي ومودتي

Azza Moghazy said...

صديقى العزيز اسكندرانى اشكرك على مجاملاتك الرقيقة العديدة التى لا املك ما يفى من الكلمات لشكرك عليها خاصة وانى لا استحقها
لقد قمت بنشر التدوينة بالفعل ولكن هناك الكثير من الاشياء التى كنت اريد تضمينها ولم يسعفنى تركيزى او ذاكرتى فى ذكرها وخاصة انى قد اعتدت الا اعدل فيما كتبت او اراجعه بل اضعه كما انساب من عقلى الى الكى بورد
بانتظار رايك الذى يعنى لى الكثير
شكرا لك

Alexandrian far away said...

الصديقة العزيزة عزه مغازي
ليست مجاملات على الإطلاق
أنت من القلائل الذين يشعرونني أن هناك أمل
أنا قرأت التدوينه وعلقت
أتمنى أن تكوني افضل حالا

تحياتي ومودتي