Thursday, September 06, 2007

خطاب خاص جدا

صباح الخير

أزيك؟

وأنتي كمان وحشتيني

ممكن سؤال ؟

معلش

أستحمليني

هي ايه أخرتها؟

أيه حكايتك معايا؟

وأخرة الى بينا ده أيه بالظبط؟

عاوز أعرف

ليه بابكي بالدموع وأنا بعيد عنك ولما أجي لك أبقى مش طايقك؟

ليه بتندهيني وانا بعيد ولما كنت في حضنك كنتي بتدوري وشك عني؟

أنتى عاوزه تجنينيى؟

بطلي تندهيني

بطلي تطلقي حروف أسمي مع الريح

بطلي

تعبت

تعبت أصحى من النوم على ندهتك وأقول: أيوه

أيوه أنا هنا

من يومين قلت لأمي ع التلفون أنا مش راجع إلا على دفني

عارف أنها زعلت

سمعت الدموع في صوتها

عارف أنها زعلت

ياترى أنتي كمان زعلتي؟

أنتي كمان قلبك وجعك؟

فاكره

من أكتر من عشر سنين

فاكره أكتر وقت حبينا فيه بعض؟

فاكره لما نزلت في أسوان أشرب من النيل مباشرة لأول مره في حياتي

فاكره كانت ميته حلوه قد أيه؟

مسكره قد أيه

فاكره كنتي حنينه وطيبه معايا قد أيه؟

شربت لما تقلت وطلعت الصخر بالعافيه

بس كنت مبسوط قوي

كنت سكران بميته

فاكره لما طبطبتي عليا في قدس أقداس أبو سمبل

لما قلعت الجزمه والشراب ووقفت قدام تماثيل ألهتك وصليت أني ما أمشيش

ما أمشيش أبدا

فاكره

قلت لك خليني هنا ما تسيبينيش

طبطبت عليا وحضنتي راسي

فاكره لما دخلنا جامع السلطان حسن مع بعض ولما أتوضيت وصليت أني أفضل معاكي

أفضل جنبك

في حضنك

فاكره الشمعه الى ولعتها في الكنيسه المعلقه؟

كنتي معايا

صليت أني ما أمشيش

أنك ما تبعدنيش

ما تكرهنيش

فاكره كام مره كنت ممكن أمشي؟

كام مره كان كل ألى محتاجه أقول : أيوه حسافر

وما سافرتش

ما مشيتش

كنت بارفض وأجري أستخبي في حضنك زي العيل الصغير

خايف لأخرج من حضنك ما ألاقكيش تاني

أنا أستنيت ما مشيتش

كلهم مشيوا وأنا فضلت

القهوه الى كنا بنتلم فيها شله كبيره

صفصفت عليا

لوحدي

وما مشيتش

فاكره؟

فاكره حصل لي أيه وأنا في حضنك

أيديا ماتوا وبطلوا يرسموا

بقوا جثتين متعلقين في أخر دراعاتي

قلبي برد وبطل الشعر ييجي

روحي أتحبست جوايا

فاكره لما كانت حره زي النورس في رسوماتي واشعاري؟

فاكره؟

كنتي معايا وأنا بجوع

فاكره؟

كنتي معايا وهما بيهزموني وبيحرموني من كل شىء حبيته أو أهتميت بيه

فضلت جنبك

مامشيتش

الكل قال عليا مجنون

معتوه

عبيط

فاكره علاء الله يرحمه لما كان بيسب لي عشان بارفض فرص الخروج؟

ما مشتش

وأنتي عملتي أيه؟

ولا حاجه

هو أنا...

هو أنا مش منك؟

هو أنا ما اساويش حجر في حيطانك؟

دلوقتي بتندهيني؟

وسبتيني أمشي ليه؟

فاكره كانت أمكانية سفري مستحيله قد أيه؟

فاكره كل حاجه أتسهلت قد ايه؟

ببساطه قد أيه

كأنك بترميني

مش عاوزاني

عمرك ما عطتيني حاجه

حتى الحب الوحيد الحقيقي في حياتي لاقيته في مكان تاني

كتير قوي بأحكيلها عنك

هي كمان حبتك قوي

لكن هي ما تعرفش قلبك قاسي قد ايه

أيدك بخيله قد ايه

يا واكله عيالك وطارداهم

بحبك

عيوني فدا كل ذره من ترابك

دمي ولا يسوى نقطه من نيلك وبحرك

بتندهيني؟

ما كنت عندك

ماشي في شوارعك

ما مسكتنيش ليه؟

ما حضنتنيش ليه

خنتيني ليه؟

كسرتي وعودك ليه؟

وأخرتها؟

يا بلدي

وحشتيني

بحبك

يا حنونه يا قاسية القلب



24 comments:

Mirage said...

بلدك طردت ولادها كلها

مش انت لوحدك

و مش مدية غير الوش العكر ويادوب اول ماتسيبها تلاقيها وحشتك تانى

بس هى آخرها 24 ساعة

وتلاقى نفسك عايز تهج تانى

بلدك مبقتش لولادها خلاص

بلدك بقت للأغراب

متفكرش فيها تانى

واللى يبيعك بيعه واكسب فيه

Alexandrian far away said...

يا عم ميراج بلاش القسوه دي كلها
مصر محتله بحكومة حسني مبارك خان المغوليه
وبأتحاد أحفاد الهكسوس أعضاء لجنة السياسات والحزن الوطني
صدقني ما تستحقش القسوه
أنا حاسس بمرارتك وفاهمه
وكان جوايا أكتر منها كتييييييير

تحياتي

ابو احمد said...

صباح الفل
كلنا أصبحنا غرباء الغربه وانت فى وطنك اصعب كتير من الغربه وانت بعيد
شوف الواحد بيتونس بيك وبغيرك مع انك بعيد يمكن يكون واحد الشقه جنب الشقه وأغراب عن بعض
انابشكر ابو فارس لانه عرفنى سكه التدوين وخلانى اتواصل مع ناس محترمين فكريا زى حضرتك
دمت بخير

اسكندراني في الغربة said...

صباح الخير

ممكن تخف ايدك شوية
علشان المرادي انت ضاغط جاااامد على الجرح
:(
:(

منهم لله الى كانوا السبب

تحياتي

Ρών. said...

لكن القسوة علمتني .. أن أقول : أنتِ بلدي..لكن وطني هو حضن أشعر فيه بالأمان ... أما حُضنك إنتي شوك ...شوك يا بلد

أبوفارس said...

ليه بس ياأسكندرانى..
تصدق بالله..
تلات مرات أحاول أقرا التدوينه المفجعه دى وتلات مرات الشاشه تختفى من دموعى..
والتوقيت قاتل..
لسه مودع أعز أصدقائنا أنا وأبو أحمد..
ولاكنت جنبه ولاأخدت عزاه.
.ألم سأعيش به مابقى لى من عمر..
مايحسش باللى فلته ألا المتغرب زى حالاتى..
أرجع وأقول..لسه فيه بكره..تحياتى..خالد

Alexandrian far away said...

صباح الخير يا دكتور ابو أحمد
وأنا اشكر أبو فارس أن منحني الفرصة للتعرف على حضرتك، وأنا معك أن أبشع غربة هي الغربة في الوطن
صدقني هنا أشعر بغربة اقل
ربما لأنها أرض الغرباء

تحياتي ودمت بخير
وتعزيتي القلبيه لفقد صديقك

Alexandrian far away said...

أسكندراني في الغربه
أخي في الأغتراب والشوق
معلش
أنا أسف
هي فلتت مني على الصبح كده
صباحك زي الفل

Bella said...

كلنا غرباء في بيتنا
بس لو كل واحد أمه قست عليه يسيبها ده يبقى اسمه عقوق

يعني نسيب أمنا لوحدها تعاني المرض من غير مانديها الدوا
وتتكعبل وتقع من غير ما نمد ايدينا لها نقومها من وقعتها

يرضيكم نسيب امنا واقعة على الارض والرايح والجاي يتفرج عليها ويمصمص شفايفه اما شفقة او شماتة

واحنا نسيبها فرجة للرايح والجاي

هي سابت اللى يمشي يمشي مش قسوة منها ولا كره
لكن علشان مايجيش يوم نلومها انها حرمتنا من البحث عن فرص أفضل ونتهمها بالانانية وبأنها حبستنا جنبها

أمنا تستحق مننا الحب والحنان

واكبر عقوق أننا نسيبها للصوص والحرامية يبيعوا لحمها للرايح والجاي

تصدق بالله انك وجعت قلبي وفكرتني بايام غربة مريرة

صحيح الواحد غريب جوة مصر بس برضه كلامك يوجع

من امبارح باحاول ارد على الموضوع مش عارفة

القسوة صعبة جدا خصوصا لو كانت من الاحباب

بس دي امنا برضه ومايهونش علينا انها تتبهدل لاننا كلنا سبناها لوحدها

ربنا يرد غربتك وغربة كل غريب

آمين يارب العالمين

وقبل كل ده ربنا يرد غربة مصر وترجع زي زمان

ست ابوها said...

معلش هيا قاسية بس مش بمزاجها بس كلامك مبددددددددع اوى وربنا يرجعك لحضنها انت والجميع قريبا وتبطل قساوة على اللى جواها وبراهاورمضان كريم

الطائر الحزين said...

قال رسول الله عليه السلام عن مكة : والله إنك لخير أرض الله وأحب أرض الله إلي ولو لم أخرج منك ما خرجت , لم تحل لأحد قبلي , ولا تحل لأحد بعدي

أخى دعك ممكا يفلعه الاخوان المسلمون ان كان لا يروق لك لكن لا تشطب على المسلمون هذا مؤلم جدا

تحياتى

Esmat said...

الله الله على الروعة
ايه ده وجعتنى
وانا موجوعة خلقة انا بقى لى 14 شهر لم ارى الاسكندرية فحرام والله
ولسه كاتبه لها حاجة كده عندى من يومين وانتظرت رد لم ترد
ف لو جالك رد قولى عليه
الحال صعب وانا عايزاها تلمنا بقى
-----------------------------
جلس أمامي حزين العينين- - -

اعرفها هذه النظرة

أراها كل حين ولكن

في كل مرة يزداد حزنها

لا أريد أن اسأله أعرف الرد

بادرت بقولي أجازة الصيف مرت

قال لي الأيام تجرى سريعا

الكلمات خرجت حزينة و مرة

أموت ولا أراك حزين

كيف أطيب خاطره

وقفت الكلمات في حلقي

عيناه كلها حنين

اشعر بحزنه الدفين

في عالم لا ننتمي له نعيش

لا يريحنا ولا نطمئن له

قررت أنا أن اكتفى به

فهو عالمي لا أرى غيره

فقد عزلت نفسي وصنعت

محيط خاص بى أنا

عالمي محيط بيتي

أما هو فمتصل بذلك العالم

هل حالي اسعد من حاله؟

اعتقد ذلك!!

فانا أرى نظرته عندما يدخل البيت

يرانا فيتحول وجهه إلى إشراقه

يريد أن يفتح الباب فيجدني عنده

يريد من يفصله عن العالم خارج الباب

أشعر أنى هواؤه

أحببت وجودي في الحياة

حبيبي لأهون عنك

أموت ولا أراك حزين

يشعر العليل بالعليل

ولكن هل يستطيع أن يخفف عنه؟

يكفينا إحساسنا بالأخر

فهذا يهون علينا

معا إستطعنا حتى الان

متى تنادينا - - بلادي؟

متى تأخذينا - لكي؟

متى تلملمي أولادك؟

ولا تفرطي فيهم

نحن في حاجة للرجوع لكي

والارتماء في أحضانك

متى تفكرين في استردادنا؟

تعبنا تعبنا - - -

Alexandrian far away said...

صباح الخير يا ابوفارس
صدقني الدموع عمتني وقت كنت أكتب تلك التدوينه
فلا يذل أعناق الرجال سوى القهر والظلم
والظلم في مصر أصبح كالماء والهواء - قديما طبعا مش دلوقتي- حق للجميع ممارسة ومعاناه
تعزيي القلبيه في صديقك فما أمر من فقد الصديق في الغربه

Alexandrian far away said...

الصديقه العزيزه بيلا
(يعني نسيب أمنا لوحدها تعاني المرض من غير مانديها الدوا
وتتكعبل وتقع من غير ما نمد ايدينا لها نقومها من وقعتها

يرضيكم نسيب امنا واقعة على الارض والرايح والجاي يتفرج عليها ويمصمص شفايفه اما شفقة او شماتة

واحنا نسيبها فرجة للرايح والجاي)
انا سمعت الكلام ده قبل كده فين؟
أنا سمعت الكلام ده قبل كده فين؟

أه
أنا كنت باقوله
وليل نهار كمان
والنتيجه؟
ضاعت أفضل سنوات عمري
وباندم كل يوم الصبح أني ما مشيتش قبل كده
أمنا مش مريضه
أمنا ماشيه مع ناس بطاله بيضربوا ولادها بالجزم وهي مسطوله أو سكرانه مش عارف
لكن الناس نايمه في مية البطيخ
وألي يطاطي ضهره يستحق يتحط له عليه بردعه

أسف للمراره
تحياتي

Alexandrian far away said...

عزيزي الطائر الحزين
تحياتي القلبيه
طبعا أنا مش باشطب على مسلمون كمسلمين أكيد
أنا أنزع عن هؤلاء الفاشيست الأسم الذي يتمترسون وراءه وأصمهم بحقيقتهم
لكن طبعا لم اقصد ولم يخطر في بالي المسلمون كمسلمين، أقولك واحد أعرفه وقعت في أيده نسخه من كتاب الفرقان، الفرأن أللى مكتوب بأمريكا وبيوزعوه في الكويت، مكتوب عليه الفرقان ، الفرأن الجديد
هو ببساطه شطب كلمة قرأن بقلم ماركر
مش كراهيه للكلمه لكن تنزيها لها أنها تتحط على الهبل ده
وصلت الفكره؟

--------
مرة أخرى أعجب بأختيارك للنص، ربما يتعلم منه شيخ الأخوان المخرف كيف يحب وطنه ويبطل يقول : طز في مصر

تحياتي وسلامي
ورمضان كريم

Alexandrian far away said...

بلدياتي العزيزه
ست أبوها
عاش من شافك
أزيك؟
شكرا على المجامله الرقيقه، كل ما فعلت أني فرغت شحنه من قلبي على الكي بورد
وهي إن لم تأخذني في حضنها فهي في حضني وقلبي ووجودي كله

تحياتي ورمضان كريم
سلمي لي على ابو العباس بعد الفطار وحياتك
وقولي له مشتاقين يا مولانا
ملعون ابو الغربه

Alexandrian far away said...

العزيزه
Esmat تصدقي أيام ما كنت بأشتغل في القاهره كانوا بيقولوا عليا مجنون لما تنط في راسى أخد بعضي وأنزل أسكندريه وأقولهم أصلها ندهتني


متى تنادينا - - بلادي؟

متى تأخذينا - لكي؟

متى تلملمي أولادك؟

ولا تفرطي فيهم


صحيح متى؟

الطائر الحزين said...

اعلم ان هذا قصدك
وانك لا تريد الاساءة
لكن لو فهم آلاف قصدك ولم يفهم مئات لحملت وزرهم
خصوصا اذا كانت هناك وسائل أخرى للتعبير وايضا هذا صفة للتعميم انت اول من ينكرها

وصلت الفكرة؟؟

صاحب البوابــة said...

كل عام وأنتم بخير

يهل رمضان من بعيد

حاملاً لي أحلى الذكريات دائماً

أصدق العبرات حتماً

أخلص العبادات دوماً

لرمضان عندي مكانة خاصة

ولكم أنتم أيضاً

يا أحبابـــي

فكل عام وأنتم بخير

وأنتم إلى الله أقرب وعلى طاعته أدوم

Egypt Rose said...

ايه ده

شوية شوية على نفسك وعلى حبيبتي .. هى عملت ايه فيك علشان كل ده .. انت بتخلط بين الناس فس مصر و البلد نفسها بارضها وشوارعها ونيل و عمارات وسط البلد والزمالك و الميريلاند وووو

فيه ناس عيشين في مصر بس مش مصريين اصليين فيه مصريين نازحيين كثير وهم اللى مشوهين البلد

تصويرك ان مصر وحدة ست غداره وقاسية مش حلو .. لو هنشبة مصلا بالست يبقي انت رجل اتبسط من الست ورماها ولم ينتظر ان تستمتع هى به او بالفعل نفسه وسبها ومشي مع اول فرصة

بلاش القسوة على مصر ونبي ده انا بحبها وبعشقها وده لا يمكع من كوني بكره الناس اللى فيها ولو جاءت فرصة للحياة في بلد اخرى ممكن افكر واسافر مش لان مصر وحشة لان الناس في مصر وحشيين من النازحين من الدول المجاورة و من الارياف والنجوع ومن بلاد تركب الجمال

ويا وحش ما تقلش لماما الكلام ده .. مش هرجع تاني وهموت برة .. حتى لو ده الصحيح واللى هيحصل بعد الشر عنك ومتقهاش كده .. اضحك عليها وقلها انك راجع .. متوجعش قلب امك وفيوم من الايام هيكون عندك اولاد وهتفهمني

اصحى الصبح واتجه بوجهك ناحية الاهرام وادعي مصر تسامحك يا ولد

جوستيـن said...

:)
جميل
والحاله دي بقي كمان ليها كم اغنيه كدا
يوجعوا ويعيشوا الواحد اكتر
:)

Alexandrian far away said...

صاحب البوابــة
كل سنه وأنت طيب والعالم كله بخير
رمضان كريم
ولو أنه بجد مالوش طعم هنا خالص
ولا في أحلى من رمضان في مصر

Alexandrian far away said...

Egypt Rose
عزيزتي
أنا لا اقسو على وطني أبدا
ولن أفعل
وأعلم ما بوطني من أزمة وخراب وحكومة خائنة عميلة يقودها شيخ منصر رسمي
ومصر ليست فقط حبيبتي بل امي وأبنتي وكل ما لي من تراث أو قيمه، وهي كل ما أمتلك لأشارك به في الحضارة البشرية
وصدقيني أنني أحلم باليوم الذي أعود فيه اليها

لكن فيه جمله مش فاهمها في تعليقك

لان الناس في مصر وحشيين من النازحين من الدول المجاورة و من الارياف والنجوع ومن بلاد تركب الجمال

يعني ايه الجمله دي؟

Alexandrian far away said...

جوستيـن المبدعه
الأغاني أللي توجع القلب كتير
بس فين القلوب الى تتوجع

:-)